انام وتصحا في بالي قصيدة بصفحة الاجفان

صحيت ارسم ملامحها على عيون الفجر دانه

ابنثرها بوجه امي مدام امي لها عنوان

قبل طير الفجر يصدح.. صباح الخير بالحانه

قبل صبح الشجر يفتح جفون الورد بالاغصان

قبل جفن السهر يلمح شروق الشمس باعيانه

صباح الخير يايمه صباح الورد والتحنان

صباح النور يانور الصباح وبسمة اوجانه

صباح النبض ياقلب القصيد وشمعة القيفان

صباح القلب ياروح القصيد ونبضة اوزانه

صباح المسك ياعطر الحياة بنكهة الايمان

صباح الحب ياعشق الضمير وكنز ايمانه

انام شلون يايمه وزولك فيني هو يقظان

اخاف اكسر قناديل الفجر بعيون يقظانه

واخاف عيونك تهاجر عن عيوني وانا الخسران

اذا في عيني ما شلتك تموت العين ضميانه

تعالي غيمة بدروبي ترى قلبي لها ضميان

تعالي في معاليق الحشا غيثي ضمى اركانه

تعالى واسمعي نبض الغلا يصدح به الشريان

عرفتي يمه وشلونه غلاك بروح ساكنه

فديتك يانغم لملم شتات العمر والاحزان

فديتك ياعمر لملم كسور القلب باحضانه

نهضت بخاطري اضوي زوايا روحي بالقرآن

واناجي قلبي بقلبي على ترتيل قرآنه

نهضت ومن ورا ضلوعي يصيح القلب انا الإنسان

ابصرخ لين ما تصحا ضماير ناس غفيانه

بعضنا بات من امسه وبات بقلبه النكران

ينام ويصحا من نومه على الحان شيطانه

نسى من كانت بعمرة تجوع وهو يجي شبعان

نسى من كانت بصغره نهر يسقي ظما اغصانه

عبث يمشي، طفح قلبه من ذنوبه من العصيان

بكل خطوة تفز امه وتشرب علقم احزانه

تشوف عيونه وتذكر سنين الضيم والحرمان

تفجر قلبها لوعة على نيران بركانه

تقول منين ياوليدي اجيب لقلبي السلوان

وانا كل الالم فيني حطب والهم نيرانه

وهن عمري وهن قلبي وانا انزف من الاحزان

ولا هزك بحر دمعي بعد ماصرت ذبلانه

بعد ماجفت عيوني تعب، واهديتني نسيان

تهد احلامي وتبني الم في روح شقيانه

خسارة ياولد عمري بكيت وتهت حيرانه

حسافة يا ولد عمري بكيت وتهت حيرنه

اعد اوجاعي بعبرة تتيه بعالم الوجدان

تسافر للامل ترجع تموت بصد بيبانه

وتتكسر بي الدنيا ظلام بوحشة الهجران

ورى بيبان تصفقها رياح الوقت وازمانه

وكم نبضه بقت فيني تعيش تخايل الاكفان

وكم خطوة بها قبري دنا وانحط باكفانه

خلاص الجرح ياجرحي وصيته دعوة الغفران

اذا شلت النعش تذكر نزيف القلب واشجانه