لكل انسان وقفة تأمل مع النفس ومناجاة مع الخالق جل وعلا والشاعر الركيبي يصافحنا بعد غياب بهذه القصيدة الرائعة
يارب انا في روض عفوك تنحيت
عن البشر وذنوبها جيت تايب
وعن سربة الغاوون يارب صديت
لاجى بوجهك عن دروب النوايب
اصبح على ذكرك وانا جيك لمسيت
وارفع بكفين الرجا ولك آيب
اغفر ذنوبي يامقدس حجا البيت
لاصرت عن دنياي راحل وغايب
في حفرة (ن) واسمع وانا الراحل الميت
قرع الخطى من عند روس النصايب
راحو هلي بقيت وحدي وناديت
عاد الندا في وسط الاضلاع هايب
لابه لقب /لا شعر / لا مجد / لا صيت
ولا عاد به فزعات ربع وقرايب
ظلام موحش ضيق فاقصاه حليت
موقف يخلي صم الاحجار ذايب
الصمت مطبق فالزوايا وانا اصغيت
والخوف اخذ من كل الاركان نايب
واقبل ملك يسأل يحاسب ورديت
بللي عملت ودمع الاجفان رايب
مشهد يموت به الحكي غير ياليت
ودرب يخلي حاجب الطفل شايب
يارب قبل الموقف اللي ذكر جيت
ولا تردني يارب الارباب خايب
انا اعترف في دنيتي غصب سجيت
احسب عدال الدرب، والدرب عايب
ذنبي تعاظم والعفو منك لخطيت
ورحمتك ساقت للهشيم السحايب
ومهما غفلت وفي سباتي تماديت
ومهما على الرغبات سقت الركايب
اليوم انا في اعتاب عفوك تنحيت
مستغفر شاكر لفضلك وتايب
التعليقات