‫ الى رزقـك الله بـعـلـم وعـقـل ولـسـان فـصـيح

حاول توظف ما عطاك الله على افضل مستوى

امـا تـعـالـج مشـكـلـة قـلـب ٍ مـن الدنـيا جريح

والا تـوقـــظ غـافـل  ٍ مــع دورة الــدنــيـا غـوى

كـم كـلمة ٍ تعطي نتايجها على الوجه الصحيح 

لا تـحـقـر الكـلـمة تـصـيـر احـيان للسامع دوى

يـمـكـن تـوجـه فـي كـلامك ناس ٍ تقوم وتطيح

ويـمـكن كـلامك ما يوافق ناس اهل ميل وهوى

بين الاوادم فـرق والعـاقـل ضـمـيـره مسـتريح

ويابـعد فـرق اللي نـوى للخـيـر واللي مـا نـوى

لابـد مـا تتـعـب ولـكـن خـلـك انـسـان ٍ صـريح

ومن قال جامل باختصار يـقال لـه مـالـك لـوى

بعض المجامل يزعجك ويضيّق الكون الفسيح

نـهـايــتـه لا نـاتــج ٍ يــرضـي ولا لـه مــحـتـوى

واللـي عـلى معلومته في وقت حاجتها شحيح

بيـن البـشـر مـالـه قبـول الـى سـرح والا ضوى

كـل  ٍ نـصـيـبه يـاخـذه فـي ذم والا فـي مديح

وطبع الاوادم يخـتلف وعـقولها مـاهـي سـوى