عسى النوايا يا فتى الجود للخير

سقياك للبلها زيادة بالإيمان

الأجر ثابت للبهايم.. ولطير

لا صارت النيّة بصدق.. وبرهان

إغاثة المحتاج طبع المشاهير

قدم له الميسور من باب الإحسان

على الرشيد - رياض الخبراء

سلام يا من حن قلبه على النوق

وسقيتها في وسط صحراء زلالي

عسى يمينك يا بطل تسلم العوق

والله يزيدك من فضوله حلالي

هذي عوايدنا هل الدين والذوق

نرفق بحيوان الفلا.. والجبالي

محمد عبدالله الشهري - جبل أثرب

أسْقَتْهم العِيس فوق اِظهُورها المَي

وصُوره بها شَي مِن دَينٍ يِرِدُّونِه

المَا عظيم الأجر للكاين الحي

يمكن بَها لِه حياةٍ يوم تِرْوُونِه

الصَّيف أوْشك لِهِيبه ينطِوِي طَي

وسْهيل بَاقِي قليل ايَّام مِن دُونِه

عسى دِيارٍ عزيزه مَا لَها زَي

تسلم لِمِن حطَّها في داخِل عيُونِه

سعود عائش الحربي - جدة

‏‫

العتب ثم العتب هذي طميه

حوضها مخصص وعليه تدرب

ومن غلاها يسقي الناقه ضميه

ما تهابه تشرب الصحه وتقرب

حمد عبدالله الوايلي - حوطة سدير

الحر طوّل والعرب ترقب سهيل

ومن بعد شوف سهيل ترجي للأمطار

بعيرنا اللي انهد حيله من الشيل

يشرب من الصحه قواريها صغار

الشكوى لله دامك أبطيت يالسيل

الحر مثل الموت قصّاف الاعمار

عزالله يالمعزب تجملت بالحيل

الله يفك الذود من كل الأشرار

خالد ناصر المخيمر - روضة سدير

يسقي المطيّه مويه من القوارير

آثر على نفسه يسقيه ناقه

الدين والشيمه وحبّه عمل خير

واقف يشرّبها بـ لطف.. ولباقه

أجر السقايه ما يبي أي تفسير

الكتاب والسنه داخل نطاقه

سعود بن عبدالعزيز الهزاع - نعام

يا ليتها من راعيه ما شربتها

تبي لها حوض وسيع رهاوي

علبه صغيره و ليتها رامحتها

ما تكفي العلبه والامر سماوي

يا زينها تمشي وتومي رقبتها

من دون قيد وضاريه للصحاري

خليف فهيد الحربي - الرياض

نرحب بمشاركاتكم الشِّعرية، وما تلتقطه عدساتكم من الصور الهادفة والطريفة على إيميل الخزامى:

rb-khozama@alriyadh.co

صورة العدد (أحد أحياء الرياض بعدسة الطبيب الأميركي داريل كرين 1950م)