بيت وصدى

إعداد:عادي الشمري


كان البيت المطروح الاسبوع الماضي للشاعر محمد الديحاني والذي يقول:
أقبل الشهر الكريم وجدولن كل المقاضي
واطلبن شيء يكفيهن سنوات عديدة

وهو يناقش موضوع الاسراف في متطلبات شهر رمضان وكان صدى البيت من الشعراء:
وعود الرجال من سوقه وصار الجيب فاضي
وباقي الراتب يوزع في فواتير جديده
قمة الاسراف هذي ما احد عنها صار راضي
لازم التوعية تأتينا بصفحات الجريده
يا الله اني طالبك يا باسط سبع الاراضي
ان تبلغنا نصوم الشهر في احوال سعيده

ابراهيم بن مسمار القحطاني
الرياض

نشتري للبيت عزبه ثم يصير الجيب فاضي
في بطون السوق كلن قام يطعمها رصيده
يا جماعة لو رجعنا للورى في وقت ماضي
كان نلقى كل واحد لا لقى تمرة تفيده
الشهر شهر الصلاة وربنا يا العبد راضي
سلسل ابليس اللعين وحط في رجليه قيده

ابراهيم بن حمد النخيلان
الاحساء

كان ماب البوك ما يكفي لها جب باقتراضي
قل نبأ مهله ليالي ووفا مطلوب العميده
واطلب اللي من كرم جوده بسط سبع الاراضي
وعاد لك شهر الكرم والخبر ذي فرصة سعيده
آخر الدنيا زوال وتالي العمر انقراضي
والعذارا في طلبهن كل يومين تزيده

بدر بن خلف الحزيمي

همهن ملي السفر من كل خير من المقاضي
من جميع اشكال من حاجات وانواع جديده
من يطاوعهن على التبذير فيه العقل فاضي
جاهل يا الله دخيلك من تصاريف بليده
صومنا لله سبحانه عظيم الشان قاضي
نرتجي فيه الثواب ونطلب المولى يعيده

غازي سهيان الحبردي - البكيرية

وسحبن جيب الضعيف لين صار اليوم فاضي
وراجع الصراف لكن ما لقى شيء برصيده
ما يجوز اسراف ولاحد يا جماعة خير راضي
ذي سلوم ما نبيها مكلفة ما هي مفيده
ارحمونا وافهمونا واجب بعض التغاضي
يا حلو درب السعادة وخلوا دروب عنيده

محمد بن عبدالعزيز الخنيفر
أشيقر

يا عباد الله شهر الصوم رحمة واتعاضي
يبتغي منا العبادة ما يريد اكله جديده
والهدف ما هو بتجميع المقاضي وانقضاضي
الزهد مطلوب والاسراف تاباه العقيده
كلنا امة وسط يا ناس حاضرنا وماضي
البذخ ما هوب هين نقمة الباري شديده

علي الزولاني - فيفا

والرجل عينه تناظر مير بالاسراف راضي
ما يهمه لو يصرف ما تبقى من رصيده
راضي باللي يشوفه صار بالامر متغاضي
خسر اللي في يدينه والخسارة ما تفيده
امتلا المطبخ ومخزن قبل هذا الشهر فاضي
جاب ماب السوق من حاجات واصناف جديده

زهران عون الله المطيري
بريدة

يا محمد بنت حواء عندها فالبيت قاضي
ان حصل منها تمادي يفرض اوامر شديده
كل شيء بالتفاهم والتكاتف والتراضي
يندرج في مصلحتكم ياهل الارياء السديده
أم سامي وأم رامي وأم عبدالله وراضي
قصدهن يبغن الاسرة في لياليها سعيده

هميجان بن عبدالمحسن المقاطي - الرياض

الرجل هو المكلف حتى لو ما كان راضي
ولازم يجيب المقاضي كاملة وايضاً جديده
وأي كلاماً يقوله يعتبر كلام فاضي
لو شكا وقال ارحموني كل هذا ما يفيده
يا جماعة كل من يبي جسماً رياضي
يلتزم بالصوم واكله لا يزيده

زبن مقبل العنزي  بريدة

راح للسوق اشتراها بالزعل ما هوب راضي
اشترى شيء يحتاجه وجاب شيء ما يريده
والمستودع مليان فيه اغراض العام الماضي
ما يبون اللي قديم يبون اغراض جديده
طارت فلوس المسكين وصار جيب الثوب فاضي
شرى شيء ما له داعي رصيده على الحديده

علي غنام الغنام  رياض الخبراء

بيت الاسبوع
كتبه للصفحة الشاعر نافع الحربي من الرياض ويقول:
يالله بنوّ بأول الوسم مزبور
غر تهشم بالمنابت مطرها
نستقبل المشاركات وصدى البيت بثلاثة أبيات على فاكس 4871070حتى مساء الإثنين من كل أسبوع ، ونرحب بطرح بيت الاسبوع.