اللغز

إعداد - عادي الشمري:

الاسبوع الماضي كان لغز الخزامى للأخ علي رشيد الرشيد من رياض الخبرا وكان حله "البيز" قطعة من الخام تقي يد من يمسك بالدلة وقد توصل للحل شعراً كل من:

يا اهل الخزامى جهدكم جهد مشكور
مشاهده بالعين أيضا وقاريه
مجهود مثل الشمس واضح ومشهور
ومن شاف صفحتكم كلامي يلاقيه
ولغز بصفحتكم موثق ومسطور
حله تراه البيز قولوا لراعيه

صالح بن عبدالله التميمي - الرس

يا ابو رشيد اللغز واضح ومخبور
على لزومه صاحب الكيف يشريه
تمسك به الدلة وتمشي على الدور
للي على اليمين واللي يواليه

عزيز مقبل العنزي - بريدة

  يا محلا الفنجال مع فجة النور
من كف قرماً تو ما هو مسويه
في دلة صفراء بها الهيل منثور
(والبيز) عن حر اللهيبة يوقيه

زين مقبل العنزي - بريدة

لغز لقيته وسط الاعلام منشور
وحبيت اشارك يوم بانت معانيه
البيز يابن رشيد ينفع وميسور
حطه معك في عزبتك لا تخليه

عبدالله هليل الحربي - الخرج

يا للي بنيت اللغز مشكور مشكور
واللي نشر لغزك عسى الله يحييه
البيز حل اللغز واللغز منشور
واللي يدير الكيف بيزه يباريه

عبدالله الصالح الاطرش - الرس

لغز قريته واصبح البال مسرور
واقول راع اللغز يا الله تحييه
البيز حله ياعلي وانت مشكور
اللغز حليناه لو كنت مخفيه

محمد بن ناصر العريني - الرياض الخبراء

يابو رشيد اللغز واضح ومشهور
هذاك بيز وفي يسارك تلاقيه
عند الدلال براس طعس ومخبور
كم مرة للبر تطلع وتغديه
لكن على تعويض هالبيز مقدور
طاقية من راس أبو دحيم ليديه

محمد بن عبدالرحمن أبو دحيم - القصيم البدائع

يا مرحباً باللغز واللي لهم دور
عبر الخزامى كل جمعه تلاقيه
هذاك بيز للمهمات مذخور
وان كنت انا مخطي ارجو تلافيه
إبراهيم الخلف - بريدة

اللغز يابو رشيد جيد ومحكور
قطعة خلق خاطوه بيز نسميه
من ضيعه ينخى فتاة على الكور
طاقية اهل الكيف تفزع لناسيه

عبدالله بن صالح النصيان - القصيم - الرس

يا مرحباً باللي بالألغاز دكتور
اللي صعيب الحل ماهو بمشقيه
والبيز الملقاط عندي لهن دور
وامهيلات لالفى الضيف نسقيه

حجي بن سليمان الحجي - الاسحاء

صفحة اخزامى شذا ورد وعطور
يا ابو رشيد تشدا النفل في مفاليه
قريت به ياصاحبي لغز مشكور
بيز وكبريت محد بمغديه

فزاع بن عبدالله الشمري - حائل

عبر الخزامى وراعي اللغز مشكور
حيثه جميل واضحاًتاً معانيه
البيز عن اهل المحاصيل له دور
يحفظ يمينك وراعي الكيف يشريه

صخري مفرح العنزي

لا قول لغزك شين ولا قول محكور
ابا احتفظ بالراي مانيب مبديه
ابا اكتفي بالحل وابديه بسطور
واقول هذا البيز لوكنت تخفيه

عبدالرحمن صالح العبدالله

يالشاعر اللي تكتب اللغز بسطور
قريت لغزك واتلمس حراويه
"البيز" دايم مع هل الكيف مخبور
واللغز عندي ما تعجز معانيه

قاسي متعب الظويفري - الرياض

كما توصل للحل نثراً كل من:

خلف خليف الشمري - الرياض، سعدون خلف العنزي - الرياض، بدر نايف الحربي - القصيم، ملفي هايف الحربي - القصيم، مسلم سلمان السبيعي - الرياض، مشرف عايض المطيري - حفر الباطن، عودة عواد العنزي  تبوك.

لغز الأسبوع:

كتبه - عبدالله الصالح الأطرش من الرس ويقول:

ويش النحيف اللي يجي معترض عرض
مربوط برجله وياقو باسه
وليا رقد يرقد ولا هو على الأرض
يرفع أبوه ومرقده تحت راسه

نستقبل الحلول على فاكس:  4871070خزامى الصحاري لغز الأسبوع.