صوت الصورة

الذود خله يقطع السيل ويعوم
سبحان منهو علمه للسباحه
لا من حداه الوقت والسيل ملزوم
يمشي على دربه ويتبع مراحه
يالله يافارض على خلقه الصوم
يامرسل محمد بدين السماحه
أنزل علينا الغيث يوم بعد يوم
وألطف بحال اللي تعذر مراحه
خالد بن ناصر المخيمر - روضة سدير

يمّ الشحم مازل منهو امسميك
سفينة الصحرا صدق يوم سمّاك
خضتي نهرهم في يدينك ورجليك
خضتيه وأخجلتي غشيم تحداك
نجد السعد تلقين فيها مفاليك
تلقين أهلك اللي تعزك وترعاك
إلى زما المظهور خفلك ايهقويك
تلقين بعروقه غناتك أو مفلاك
فهد بن عقيل الطويان - بريدة

اليا اجتمع عشب وجو وغدران
زال الظما والحر ودع مطاياك
تفرح به الخلفات مع ام حيران
وللحيا يا مدوره سق رعاياك
من دموعك يالسما الكل فرحان
يا موطني عسى الهماليل تنصاك
وللخزامى حب أو كل عرفان
أمدور الإبداع بالشوف يقراك
سعود عائش التميمي الحربي

سفينة الصحراء شبيه السفينه
وسط الخبارى كنها وسط الأبحار
مثل السلاسل والمناظر حسينه
في منظر من شافه اليوم يحتار
والغابة اللي من يسار ويمينه
بجو يسر القلب تكسيه الأمطار
يحلى بها المكشات وترك المدينه
في جلسة فيها السوالف والأشعار
محمد بن عبدالعزيز الخنيفر - أشيقر

الهجن في قلبي لها دوم منزال
ان شفتها شعري تكلم قوافيه
حبي لها ما غاب دايم على البال
الله أكبر يا زمن هن ماضيه
يوم البدو من فوقهن دوم رحّال
كلٍ مع البيرا تحدى مساريه
يا فخرنا الماضي ليا اليوم ما زال
وماضي جدودي ماني اليوم ناسيه
طلال معيض العنزي - بريدة

يا حيله الله عطايا الله سوابيح
يا زينها لا ابحرت سفن الصحاري
ادرو علي الحشو وامات المطاريح
والا من البل قصيرات السماري
وان كان في الجيب رعيان مصاليح
لازم حداهم على رجله يباري
والثاني يدور احزوم صحاصيح
والا عروق تعديه الخباري
علي بن ثابت القحطاني

سفاين الصحراء على مر الأجيال
شفته مع الوديان تمشي إبراحه
تسبح مع الغبه من الجال للجال
تبرى له اعياله بيسر او سماحه
ترعى من الاشجار والسيل هتّال
وتارد على الغدران في كل ساحه
هذي عطايا الله جميلات الأشكال
كلامنا واضح بصدق او صراحه
علي رشيد الرشيد - رياض الخبراء

سبحانه ربي خالق الخلق بتقان
الواحد المعبود ربي العبادي
سبحان منهو ذاكر الابل ياخوان
في محكم التنزيل وصفٍ وكادي
الذود ماشي في نظاماً وميزان
في وسط سيل كنه النهر بادي
والجيب يرقب صاحبه فوق كثبان
يدعي لعل الذود يمشي بركادي
مقرن بن متعب الهرف - الرياض

يا جماعة تر الجمل هي سفن نجد وغيره
لو حصل سيل شفت الجمل بواخر حقيقه
إن بغيت الصحارى هي وحيده جديره
فالصبر والعطش تصبر وايضا تطيقه
يا كريم تعلى ما به احد نضيره
يا رحيم رزق خلقه بروق بريقه
محمد عبدالله المجلي - حوطة بني تميم

ياالله عسا راع المغاتير سباح
يسبح ما توه بيتعلم اسباحه
يرد ذوده فالبحر كل ما راح
ولا يتعبه عرض البحر والمساحه
ذود هو ممشا البحر فيه يرتاح
ما له او مال البر خلا مراحه
العشب قل وصارت دياره شحاح
فرح الولي يغيث دار شحيحه
غنام مسعود القريشي - نعام

حسبي على اللي حدها تقطع السيل
من يوم نزلها يجر المسيله
انشهد انه مخطي يا رجاجيل
وسيل الفحل لا قام ما فيه حيله
هذي عطايا الله وذا شاطي النيل
تجزع مع الغبات يا اهون وسيله
عبدالهادي العرجاني - الافلاج

الليل جاني وانا بردان
والشبك وينه وانا ويني
والدرب عندي غدا خلجان
من عمقها غاصت ايديني
ورفعت رأسي عن الطوفان
وقطعت ويا رب اتعيني
عبدالله سليمان الدخيل - بريدة

صوت صورة تثني شكر للي صوره
شاقني منظر جمال الجمال ابها الجمال
قدرة المولى العظيم خالقه ومقدره
من مياه ومن شجر مع صفاء الجو اكتمال
الزوامل والبكار والحشو به نوره
سعد عين اللي يحوشه في صحا صيح الشمال
هي عطايا الرب يوم المعيشة مدوره
الركايب والضعون له شداد ما يشال
فزاع بن عبدالله الشمري - حائل

ترغي وتسمع له حنين من الصوت
ترفع حنين الصوت كل البعارين
السيل حاجرها وخافت من الموت
والأرض تحت رجولها كلها طين
تحاول الطلعة قبل فايت الفوت
وراء بعض طابور بالسيل ماشين
سفينه الصحراء غدّت كنها حوت
تقوم وتسبح فيه مثل الدلافين
علي غنام الغنام - رياض الخبراء