بيت وصدى

إعداد: عادي الشمري

الاسبوع الماضي كان بيت الاسبوع المطروح للشاعر ابراهيم مسمار القحطاني من الرياض الذي كان يناقش قضية اختبار القياس بعد الشهادة الثانوية والذي يقول:
الطالب المجتهد جاه اختبار القياس
حتى ايش لو انه الاول على المدرسة
ومع كل الشكر للمشاركين إلا ان العدد القليل منهم تناول رأيه وقدمه عبر الابيات وهذا هو الهدف ونعتذر كثيراً عن عدم نشر مشاركة الاخوة الذين كان صدى ابياتهم بعيدة عن محور الموضوع المطروح، والمشاركات كالتالي:
ضاع اجتهاده الى منه تلعثم وحاس
صار الضحية ما بين العلم والدحوسه
واللجنة اللي تقابل بين ناس وناس
ما تفرق الطب ولا راغب الهندسة
ليت القبول ايتخير من رفيع القياس
لا جاب ممتاز سجلوه في مجلسه

علي رشيد الرشيد - رياض الخبراء

اللي تفوق على اقرانه بجهد وحماس
يقدر يحدد مساره فوق ظهر فرسه
الله وهب له عقل والله وهب له حواس
ما همه الاختبار اللي يدق جرسه
الفضة الصافية ما هيب مثل النحاس
واللي حصد زرعه العام اجتهد وغرسه

هميجان بن عبدالمحسن المقاطي - الرياض

من جاب ممتاز سالم من دروب العكاس
ياللي تبي تعكسه بالله لا تعكسه
وش فوق ممتاز حتى انه يزيد الحماس
بعض الدعاوي تجيب الهم والوسوسه
زود العراقيل للانسان هم وعماس
لصارت اول حياته حوسه وكعمسه

محمد بن عبيد الديحاني - رياض الخبراء

هذا اختبار ترى في العلم ماله اساس
يحطم الطالب الممتاز ويحوسه
ويضيع اللي براسه من ذكاء وحماس
ويطفش الطالب من العلم ومدرسه
ولو ما عليها شهادة كان قلنا لا باس
حنا نقوله ومن طلابنا نلمسه

عائض بن هميله السبيعي

خذ التقادير ولكن ما يفيد الحماس
مسكين ياللي مشى بدروبه المدمسه
سعى وطريقه لقا كله هراس بهراس
ودروبه اللي مشاها كلها مفلسه
وصار الضعيف عليل ودايم في عماس
تلقاه ما من هنا ولا راحة بمجلسه

محمد بن عبدالعزيز الخنيفر - أشيقر
كان القرار اياه مبني على ساس
ماهي مجرد تخيلت وهلوسة
لا بد له يلقى قبولاً من الناس
ويتم تطبيقه على كل مؤسسة
ويصبر فعلاً للمجدين مقياس
مقياس عادل ما يجيبه مطرسة

زبن مقبل العنزي - بريدة

كل هاوي في مجاله يصبح سهل المراس
ان كان في داخله حب لها اسسه
حدد مسار الدراسة واجعله لك لباس
بدراسة الطب تهوى وإلا بالهندسه
وان كان للعسكرية صار عنك حماس
اعقلها وتوكل فيها والحماس اغرسه

علي غنام الغنام - رياض الخبراء


بيت الاسبوع
كتبه الشاعر محمد بن عبيد الديحاني من رياض الخبراء والبيت المطروح يناقش قضية المبالغة والاسراف في متطلبات شهر رمضان الكريم من قبل ربات البيوت والبيت يقول:

أقبل الشهر الكريم وجدولن كل المقاضي
واطلبن شيء يكفيهن سنوات عديدة
نستقبل صدى البيت المطروح باكماله ثلاث ابيات فقط على فاكس  4871070خزامى الصحاري - بيت وصدى.
ونرحب بطرح أي بيت يناقش قضية اجتماعية.