يا موت يا مسرعك في شوي مريت..وأخليت بيتاً بالمعزة يلالي

حسين بن ناصر الجنيبي البقمي

رثاء في المغفور له بإذن الله تعالى جمعان بن سالم الجنيبي البقمي ومن توفى معه.
في كل يوم عيوني تلد فالبيت
والبيت يا عيوني من الرود خالي
ياموت يا مسرعك في شوي مريت
وأخليت بيتاً بالمعزة يلالي
لو أنها بالسيف ياموت سليت
من دونهم لاسل سيفي مبالي
لكن يا لله ثبت العقل تثبيت
ذي قدرة المولى على كل حالي
ياكيف أبنسا أهل التراحيب لاجيت
جار ورفيق وعندنا دوم غالي
ان قلت عن جيراني اليوم سجيت
لزوالهم قدام عيني خيالي
وليا مشيت ورحت كني تناسيت
وان جيت يم البيت يضيق بالي
البيت لو يشّد لي كان شديت
من شوفته دمعي على الخد سالي
أرجو من اللي مالغيره ترجيت
الواحد المعبود عز الجلالي
يالله ياجزل العطايا ليا أعطيت
لهم الجنان العاليات بنسالي
وأنا أطلبك في كل ما صبحت وأمسيت
تجعل ولدهم من خيار العيالي
تراك يا سالم على الطيب نشّيت
ومن غير درب الطيب مالك مجالي
قلته وأنا أشوفك على ما تمنيت
وأفرح بذكرك كل ما جاء سوالي
وأشكرك ياللي للمصابين عزيت
حضرت ولا كان عبر اتصالي
وأخص وأذكر من له الأجر والصيت
جاراً يشاركنا بحالا ومالي
شيخاً من أعيان الدواسر ليا ألفيت
الشيخ ابن هزاع نعم الرجالي
وأشكرك ياللي بالتماثيل رديت
وفيها دعيت الهم بغفران والي
حمود العتيبي جعل يجزاك ماشيت
والله يكافيكم صدوف الليالي
ويا رب غفرانك ورحمتك لاخطيت
لاصرت في قبري وحيداً لحالي
ويا موت يا مسرعك في شوي مريت
وأخليت بيتاً بالمعزة يلالي
#