اللغز

إعداد: عادي الشمري

الاسبوع الماضي كان لغز الاسبوع من طرح الشاعر: عبدالله هليل الحربي من الخرج والذي يقول:
أنشدك عن رجل رفيع مقامه
ينزل محل فوق قدره يزيدي
مثل القمر لونه نهار استلامه
واليوم عكس اللون شكله وكيدي
وقد توصل للحل شعراً كل من:
اهلاً هلا بك عد رش الغمامة
ياللي طرق لغزه طرق الحديدي
الحل واضح لي ومع السلامة هذا الحجر معروف واحد فريدي..
متعب بن ابراهيم الغانم - الرياض
حي الله الالشاعر وزاد احترامه
اللي بنى لغز سياجه حديدي
من زار بيت الله يشوفه علامه
هذا الحجر الاسود ونوعه فريدي
مطلق الهيلوم - الخرج

ياللي طرح لغزه بعرف وفهامه
ونظم نقاط اللغز عقد فريدي
اللغز بالكعبة علينا احترامه
حجر وتاريخه قديم ومجيدي
نايف الطريسي - الخرج

سلام ياراع الوفا والزعامه
ياشاعر للغز طرحه حديدي
ترى الحجر من جود ربك كرامه
للبيت خصه وانت رايك سديدي
نهار بن ممدوح - الخرج

رجل عزيز وغالي من مقامه
عبر العصور الماضية مايبيدي
عزالله ان اللغز محكم نظامه
والحجر الاسود هو جوابه اكيدي
خليف  الحربي - الرياض

بالحل ازاحم رجالاً نشاما
واجيب حل اللغز لو هو بعيدي
في وسط مكة بين تقل شامه
هو  الحجر ياعل عمرك مديدي
ابراهيم عيسى العنزي - الخرج

سلام يارع الوفاء والشهامة
واللغز مفتاحه يابوزيد بيدي
وترى الحجر باقي ليوم القيامه
في ظل بيت الله يحكم العبيدي
محمد بن معتق بن صخيبر - عنيزة

يامرحبا باللي ينشمي كلامه
لاصار هداف لنشاما مفيدي
هذا حجر اسود عليه العلامه
لونه تغير من ذنوب العبيد
ساير عزيز العقيلي - القصيم

يامرحبا باللي بديع كلامه
يكتب من ا لاشعار زين القصيدي
كان الحجر ابيض وقالوا علامه
متغير باسباب ذنب العبيدي
سعد مويزر مشعان البدراني - الرس

يامرحبا ياللي عزيز مقامه
ابو هليل دوم لغزه فريدي
والحل بين وسط مكة علامه
ذاك الحجر عنده زحام شديدي
كريم عيسى العنزي -  الخرج

من عهد طه لين يوم القيامه
والقبله الكعبة كلام وكيدي
فيها الحجر موضوع عالي مقامه
اللي تغير من ذنوب العبيدي
صالح محمد المضياني - الخرج

من يركب الموتر ويربط حزامه
يبغا يسافر لم درب حميدي
والى وصل للبيت شاهد مقامه
ومن الحجر يبدى طواف جديدي
علي رشيد الرشيد - رياض الخبراء
يابن هليل رافقتك السلامه
هذا الحجر يامسندي ياعضيدي
عند النزول ابيض بوقت استلامه
ولونه تغير من ذنوب العبيدي

محمد بن عبدالرحم  ابو دحيم - البدائع

كما توصل للحل نثراً كل من:

طلال فالح الغاوي - القصيم، فالح غازي الحربي - القصيم، ناصر الهديرس - الرياض، نايف طراد الشمري - الخرج،عوده عواده العنزي - تبوك.

لغز الأسبوع

كتبه محمد بن عبدالرحمن الحجناوي من  البدائع ويقول:
اخوين ياللي ترغبون الحجاوي
في كل دولة جالهم طور وشهود
اعمارهم متقاربة بالتساوي
النقص ماتنقص ومرات في زود

نستقبل الحلول على فاكس  4871070- خزامى الصحاري - لغز الاسبوع علماً ان آخر موعد لاستقبال الحلول هو مساء الاثنين من  كل اسبوع.