بيت وصدى

اعداد: عادي الشمري

الأسبوع الماضي كان بيت الاسبوع من طرح الشاعر زبن العنزي والذي يقول:

بالهرج كل عند نفسه كحيلان
وتبقى العلوم الطيبة عند أهلها

وكانت المشاركات كثيرة جداً وللاسف الكثير منها كان يبتعد عن معنى البيت ونعتذر لهم لعدم النشر ومن المشاركات الجيدة:
الطيب ماهو بالرخى قول بلسان
ما كل من هام الجمالة وصلها
طبايع يفرق بها انسان وانسان
وهايب رب البرية كفلها
الجود والمعروف والخير واحسان
عوايد أهل الطيب محد جهلها

فهد بن عقيل الطويان - بريدة

عند الفعايل والمواقيف ينبان
من راعي الكلمة ومن هو جملها
لكن خلك مثل ما قال راكان
ترى السوالف زبدها في نشلها

معيض القحطاني
سراة عبيدة
الهرج دايم فيه زود ونقصان
لكن مال الحملة الا جملها
اللي يشيل الحمل مهوب بحلان
لاثقلت الحملة بظهره نقلها
يهرج ويفعل والفعل خير برهان
هذاك زيزوم الرجال وفحلها

عبدالهادي حمد العفيش - الرياض
القول ما يبنى على غير برهان
والهرج واجد والحكيم يعقلها
والرابح اللي يجعل الطيب عنوان
واليا تعرض للثقيلة حملها
والا ترى الدنيا بها اشكال والوان
كل على لونه حباله فتلها
ابراهيم العريفي
عفيف

الهرج ما عمره قضى للبشر شان
تغتربه ناس كثير جهلها
وقول بليا فعل راعيه غلطان
اقولها وايضاً انت يا زبن قلها
مضرب مثل يبقى على مر الازمان
من لا عرف نقض الحجج ما فتلها

زهران عون الله المطيري
بريدة

أهل الوفاء والطيب برمز وعنوان
لهم صدى (نعم الوفاء) في عملها
شواهد تبقى لهم طول الازمان
خزاين في ذاكرة من جهلها
واللي لمدح نفوسها فيه بهتان
وصفة (كذوب) لواقع اسمه حملها

علي غنام الغنام
رياض الخبراء

بعض البشر بالهرج مامثله انسان
لكن لا جاء معضلة محتملها
جاهل وياشين الجهالة على شان
ماغر نفس ابن آدم الا جهلها
زود الكلام وزودة النفس نقصان
حقايق يا زبن للناس قلها
سالم الشلاحي
بريدة
الطيب له مدخل ومخرج وبيبان
ولا كل من هاز الطويلة وصلها
الطيبين لهم دلايل وبرهان
واهل الهروج الطيب لا ما شملها
يشمل هل الطاعة وذربين الايمان
ومجالس يطرب لها من دخلها

محمد مذكر المغيبي العتيبي
الرياض

الحكي ما يصلح على غير برهان
ولا كل من قاد السفينة عدلها
الطيب لأهل الطيب مبدأ وعنوان
واهل الردى دايم تبرر فشلها
ياهل الحكي والله مالي بكم شان
الطيب هو غاية حياتي وأملها

عبدالله العتيبي

ماكل طير له جناحين شيهان
ولاكل من رام البعيدة وصلها
للمعرفة قدر وللهرج ميزان
والطيبة تاج على من حصلها
وياللي تبي للطيب وصف وعنوان
رح للرجال اهل المعرفة وسلها

محمد بن معتق بن صخيبر الحربي
عنيزة
وبعض العرب هرجه موزن بميزان
ما ينطق الكلمة وهو في جهلها
ومن جاه وقت الضيق يلقى له اعوان
وبالمرجلة والطيب نفسه وصلها
وبعض العرب ماله مع الناس عرفان
نفسه عن علوم المراجل قتلها

طلال بن معيض العنزي
بريدة

يا زبن مقبل مبتداء البيت مليان
وجاكم ثلاث أبيات مني بدلها
ومن يدعي بالفهم من غير برهان
يضيع مع ناساً كثيراً جهلها
ومدحاً على غير السنع فيه نقصان
والعلم بعض المجتمع ما شملها
حمد نزال العتيبي - الرياض

ياللي بنيت البيت وافي ومليان
البيت جزلات المعاني حملها
جملة مفيدة قلت يا طير حوران
ريح الخزامى والنفل في سبلها
والطيب له في بيت الاجواد مسكان
ومن لا يعرف الطيبة ما نقلها

بدر بن خلف الحزيمي

ناس سوالفها نميمة وبهتان
ما تثمن الكلمة وتعرف خللها
تكذب وتنقل حكي في كل ميدان
أنا اشهد انه من سبايب جهلها
كل يشوف لهرجته يا عرب شان
وإلا العلوم الغانمة ما وصلها
يوسف بن منور الميموني
عنيزة
قول بليا فعل واضح وبرهان
لا سمعه الرجال كبده دبلها
واجب على الرجال يصدق علشان
محد يكذب كلمته لا نقلها
يصدق على ما قيل في سر واعلان
ويصير منزاله بقمة جبلها

ابراهيم بن مسمار القحطاني
الرياض

كم واحد في النايبه ما قضى الشان
دايم هروجه بالسعة ماوصلها
وللطيب يالاجواد ميزة وعنوان
عند الرجال اللي حسين عملها
دايم تهرج الصدق ما فيه نقصان
وما تلحق الغافل عجارف زللها

ناصر عبدالله آل مطر العنابس
الفيض

بيت الأسبوع

كتبه الشاعر عبدالهادي حمد العفيش القحطاني من الرياض ويقول:

الرجل لا ينساق من دون تفكير
فامور يجهل شرها من سعدها

نستقبل المشاركات بثلاثة أبيات على فاكس  4871070حتى مساء الاثنين من كل أسبوع خزامى الصحارى - زاوية بيت وصدى.