بيت وصدى

إعداد: عادي الشمري

كان بيت الاسبوع الماضي من طرح الشاعر عبدالهادي القحطاني من الرياض والذي يقول:
النشر يا هل النشر ذمة وامانة
ما صانها يا اهل الصحف كل مامون
ومع كثرة المشاركات والتي بلغت عدداً هائلاً وللاسف الشديد لم يتطرقوا للنشر بذاته وانما تطرقوا لأمور لا علاقة للبيت المطروح بها ونحن نأمل ان يكون صدى البيت موافقاً لمعنى البيت المطروح وإلا لما كان ذلك صدى له.
ومن ضمن الاصداء الجيدة للبيت المطروح:
لازم يجي للنشر قدر ومكانه
وايصير حق الناشر اليوم مصيون
يوم ان بعض الناس زاد ارثعانه
واذا نصحته قال مهما تقولون
مدري تغطرس او حسبها ميانه
بالله كيف احل هالوضع وشلون

ابراهيم بن مسمار القحطاني  ـ الرياض

هاجس سراطان النشر في زمانه
نفذ بها حكم مثل حكم فرعون
يقتل رجال القوم حفظ المكانه
واللي كتب له داخل الادم مضمون
ولا اعم كل اهل الصحف بالايدانه
يوجد رجال عهدهم عهد مصيون

بدر بن خلف الحزيمي

النشر ما ينفع لا جابه خيانه
لا صار كذب النشر وش يستفيدون
النشر لابد له قدر وحصانه
من شان قراء الصحف بالصدق يدرون
وكم من خير جانا ولابه ضمانه
ولا وكان بعض الصحف للصدق يسعون

مزعل بن مرزوق المرزوقي ـ الرياض

الله عليم باللي ينشر وشانه
جزله وهزله يعلمه خالق الكون
والنشر من حق اللي ينشر بيانه
لصار مابه للحياء خدش وجنون
يحكم على طيب المعاني ضمانه
دام الهدف بالنشر معنى ومضمون

خالد بن سجدي مهيدلي العتيبي

ترى الصحافة دورها له مكانه
نقرا بها الاخبار واللي يقولون
وجوب بالكتاب عقل ورزانه
وحقيقة المصدر ومنها يجيبون
وكل يعبر ما يقوله لسانه
طرح المفيد اللي له الناس يقرون

ابراهيم بن عبدالعزيز العريفي ـ عفيف

الصدق مطلوبن على كل خانه
وللي يريد النشر بالهون بالهون
كانه يريد الصدق فالنشر كانه
هذاك يظهر حق من كان مغبون
واللي يريد يصد عن ذاك شانه
والعرف لأهل العرف ما هو لمجنون

محمد بن سليمان الكثيري ـ المزاحمية

بيت الاسبوع
كتبه للصفحة مصلح بن فالح الغنامي من الدوادمي ويقول:
يا خزامى الصحاري بالعريض اكتبي
ودي اقرا صدى الشعار وش في النفاق

ويناقش هذا البيت قضية النفاق المتفشي في المجتمع ونود التركيز على قضية النفاق الاجتماعي بكل صورة من خلال ثلاث ابيات صدى للبيت المطروح على فاكس  4871070خزامى الصحاري - زاوية بيت وصدى.