السلام عليكم ورحمة الله وبركاته الى معوكس العزيز. هل تعلم  اني احلم  فيك كل  يوم كل هذا من  اجل سؤال واحد وهو اين انديتنا من  اللاعب محمد سالم العنزي لاعب قطر ارجو عدم  التصريف..

احمد المرمر - الرياض

بلا من زين ها (الاجانب) اللي الواحد منهم مثل (سوفو)  يبي له من (يجدل) شعره  بدركتر!!

الاخ معوكس
السلام عليكم ورحمة الله وبركاته - بعدالتحية
سؤالي هو ماذا  سيفعل خط دفاع نادي الهلال لو تقرر مشاركة رماريو في البطولة  الآسيوية

مطلق مبارك الدوسري

مثل ما  فعل  خط دفاع (الريان) اللي هزم السد  بـ (روماريو)!!

الاستاذ معوكس - المحترم
اذا اراد الهلال يتحاشى  اخطاء الحكام المقصودة  وغير المقصودة فعليه بوصفة  نادي  الجيران اما حكاية دعم الحكام وتجديد الثقة هذا ما يوكل عيش

عبدالعزيز  محمد العمران سدير/ جلاجل

وصفة الجيران معروفة (العسل) و(الفاصوليا) ويمكن توكل  (عيش) مفرود!!

الاخ معوكس
السلام  عليكم ورحمة الله وبركاته
اقول اعيونك  حلوة ليش  ما تلعب كورة.

أبو مبارك مطلق  الدوسري

عاد بزعمك  باشوت بـ (عيوني) عطني  (مهاجم) معه (دربيل) بشرط يدل (الباب) مثل (ترينيو) اللي يسجل بـ  (الرويس)!!

الاخ العزيز معوكس
هل تبيع اسم معوكس  بمليار  ريال؟

الهلالي - نواف الرثيع  - الرس

ابيع (الونيت) ولا ابيعه!!

عزيزي معوكس
تحية  وبعد
بصراحة عطني رايك في تسريحة لاعب الهلال  الاجنبي باتريك  سوفو

صديقك الدائم : احمد الفريجي

يبي له (شبك) على رأسه  لا تروح وحدة من (الجدايل)  ويمصعها حارس ولا  مدافع!!

الاخ معوكس
ما هو اصعب قرار اتخذه  الاتحاد الاسيوي المحترم

متعب صويان  الشمري

الاتحاد الآسيوي على (كيف)كيفك دوره عند القرارات (السهلة) الى آخرها (روماريو) طاقها.. طاقها و(اللوائح) صب  قهوة!!

اخ معوكس مع التحية والتقدير
ليش انت ما تفتح قناة وتسوي  برنامج ترد فيه على رسائل القراء وشكراً..

فهد العتيبي النهضة الرياض

ودي بـ (قناة) لو علشان  يتصل (مشاهد) ويقول  (امسي) عليك، وعلى (ضيوفك) ومصاك الله بالخير.

الاستاذ معوكس  - فاكهة الجمعة
تحية وبعد
الرسام الكريكاتوري عبدالسلام  وش رايك لو يلعب قشاش في  نادي وش تقول؟
لك.  مع تحياتي

الرياض/ الربوة علي الصالح

عبدالسلام يلف (لفتين) على (المضمار) وعلى مسؤوليتي يضمنها جنب علي  مال!!

الاستاذ معوكس
جماهير الهلال احتارت ولا تدري العلة وين هي في الادارة او  اللاعبين أوالمدرب او حتى لجنة الحكام

سفير معوكس في سدير

لجنة الحكام ناشبين في حالهم (يدورون) لقطة (بدرا)!!

الاخ معوكس بعد  التحية
وكل عام وانت والشلة اللي معك  بخير  الزبدة
السؤال (1) يقول ما هي تصريحاتك انت والشباب  اللي معك عن مباراة الهلال السعودي والعربي والكويتي؟
السؤال  (2)  يقول  ان الهلاليين الله يخليهم تدري انهم حطوا خسارتهم  براس الحكم المسكين والله هو ماله شغل اللعب ترى له دور ولو  انهم فازوا كان قالوا هذا بجهدنا  وهم ماعندهم ماعند جدتي؟ وش رايك انت بالكلام هذا؟ وشكراً.

.

انا  اصرح مع (الرياض)واتمنى اركب  (الباص) معهم  في رحلة سياحية على طريق (لبن)  حيث المناظر  الخلابة!!

الاخ معوكس - المحترم
ويش اخبار الفنان الكبير خالد عبدالرحمن يقولون عنه مرشح ان  يكون عضو شرف لاحد الاندية.

عبدالله عيسى الخرعان

ازين له يرشح (صانع لعب) خاصة انه شويت بـ  (الشمال) ويجيد الكرات (اللولبية) خارج  خط  الـ 18!!

الاخ معوكس  - المحترم
سلام وتحية وبعد
ألا توافقني  الرأي بان  ينسحب  الهلاليون من  البطولة الآسيوية لانهم سيعودون  بالخسائر. ثانياً اقترح تقام مباراة  بين النصر والهلال بشرط يتعمد النصر الخسار لأن فوز الهلاليين  على النصر باي نتيجة تسوى بطولات  الموسم عندهم.

النصراوي/ حمود بن صعينين  العتيبي القصيم

الا اوافقك بسحب التعصب من (رويسك) الين تعرف ان الربع (حبايب) والنصراويين اول من يوقف بصف (الهلال) في  تمثيل  الوطن.

فاكهة الجمعة ابو العواكيس
تحية وتقدير
الي متى ومرخ وطويق  خارج نطاق المنافسة برأيك  الم يئن  الاوان  لاعادة الذكريات والبطولات.

محمد العبدالله - الزلفي

وين معه (ذكريات)  و(بطولات) على بالك بطل  السوبر ووصيفه في المواسم العشر الماضية!!

مرحبا بروفسور معوكس  يا اخي انا  ابسعلك  سؤال  ليه لاهلحين مانسيت سالفة العسل والفاصوليا والثعابين والاما عندك شي تقوله غير هذي عيب عليك خلك رجال

سالم السالم  -  الرياض

سوالف  اول ما تنسي وانت سالم يابوسالم!!