دمعة المجروح

يا بعد جرح الفراق ويا بعد خوف القطيعه
جيت لك عاني ولا في مزهبي غير الأماني
انتهى صبر ذخرته في جهادي لك ذريعه
واستحل الشوق قلب ينتخي بين المحاني
ترسل الذكرى رياح تنسف حصون منيعه
زعزعتني.. واحسب ان تيارها ازرى ما قواني
واذكر أيام مضت ما حللت حرم الشريعه
عشرة راحت دخيلك هي دقايق أو ثواني
دمعة المجروح تنزل من على خده سريعه
لو مسحها ما خفا للمسلمين انه يعاني
يا شذى عطر الندى يا نفحة زهور الطبيعه
يا ضياء البدر لامن انتصف شهر اشعباني
جيت ما قصدي سوى مشاهد نواظرك الوسيعه
يستتب الحب في قلبي ويعلنها لساني
باسم بن علي الوشيل