يوم مثل يوم العيد

محمد بن محسن بن عمره

يا محسن اسمع دوك وافهم مني
مثايل موضوعها جديد
المرجله ضلع طويل شامخ
مرقاه من كل الجهات ايكيد
تبا شجاع ما تلين عزومه
شوفاته بكل العلوم بعيد
اصبر على الشدات من صم الصفاء
ماهوب لاهافي ولا رعديد
صميدع مثل الحسام الماضي
عن الوفاء والجود ما يحيد
طماح للعليا جزوم حازم
بأفعاله ابطال الرجال تشيد
لاجاء مجال الطيبين وفعلهم
فعله على فعل العيال يزيد
هذا هواللي ما يخيب به الرجاء
بولاد ماص يقطع الحديد
وافي الخصايل عز ابوه وربعه
لاجنب عن الواجب البليد
والمرجلة ماهيب شي هين
ولا تجي من غير شرط وقيد
تبا لها رجل يشد حزامه
يصعد لها يم العلا تصعيد
افهم كلامي يا فتى واعمل به
بالنص والمضمون والتحديد
بالمرجله والجود لاتوانا
والله يفعل ما يشاء ويريد
واليا نواك الله بعز وطاله
لو السبب عقيم صار مفيد
اوصيك بأداء الواجبات ودينك
واعيدها للفهم والتأكيد
وانذرك عن صحبة قليل الطاعه
وعن الحسود وكل رجل زهيد
بعدك عن الأشرار وارذال الملا
مكسب ويوم مثل يوم العيد
رافق رجال بالوفاء معروفه
سلوكهم من طيبهم حميد
عساك تسمع ما ذكرت وتفهم
والله على فعل العباد شهيد
تمت وصلى الله على خير الملا
ما طوَّحن الورق بالغريد