ولاية حب

نايف زويد المطيري

عيشي حناني قبل ما عيني تموت
في حب غيرك.. ثم تنسى الحكايه
تمتعي.. من قبل ما يفوتك الفوت
اللي معاي اخذيه.. واللي ورايه
دامك وحيده كل ما جابك الصوت
وشلون ما تمطر عليكي سمايه
عيشي ربيعي.. وخذي القلب تابوت
تميزي من بين.. كل البرايه
حنا رواية.. شهد سكر وياقوت
يموت غازي.. ما كتب هالروايه
ايه استقلي من عساهم مكبوت
بأول ولاية حب.. وآخر ولايه
حالف تخلي حكينا.. كنه سكوت
همس البداية.. مثل همس النهايه
من وردة النرجس.. إلى شجرة التوت
طعم السوالف.. من حلاك وحلايه
الله من رمشك.. إذا صار مبهوت
انسى معه دنيا.. وراها عنايه
لو شفتي افعاله.. ويالقلب مخوت
سوى غرابيل الدهر في حشايه
ما عاد ينفع بالزمن.. ثبت وشوت
اللي معاك.. شوى.. واللي معايه
بعد الولايه.. ما نبي نلبس بشوت
ولا قصور ولا بيوت.. وسرايه
تبقى ولايتنا.. وحتى اننا نموت
أول ولايه حب.. وآخر ولايه.