اللغز

إعداد: عادي الشمري

الأسبوع الماضي طرحنا لغز الأخ/ عبدالله هليل الحربي  من الخرج والذي يقول:
انشدك عن عدة بنات شريفات
اللي رفيعة قدر واللي صغيره
زواجهن دايم ودايم طليقات
ومن طلق الصغرى عطوه الكبيره
وقد توصل للحل شعراً كل من:
اهلا هلا براع المعاني الجزيلات
عد الجيوش اللي بشبه الجزيره
واللغز حله دون شك ونزاعات
هي المراتب يا وسيع البصيره
صالح محمد المضياني - الخرج
جاكم جوابي في بيوت خفيفات
فيهن نفك اللغز ونريد غيره
للجند والضباط شفن قريبات
رتبة عساكر قلتها دون حيره
غنام الغنام - المستجده
حل البنات البينات الثمينات
واضح مثل بيض النجوم المنيره
بنات لازالن وهن عسكريات
يمشن برفق العسكري مع وزيره
راضي فهد الزميلي الشمري - حائل
بعد السلام وبعد جزل التحيات
اقول لغز الرجل ما به قصيره
يستاهل الحربي هذا خمس رتبات
اللي بصوغ اللغز عنده بصيره
عبدالهادي العرجاني - الافلاج
الرتبة اللي للرجل هي شهادات
تبدأ بصغرى وتنتهي بالكبيرة
بعض الطلاق اليا حصل له علامات
وازواجهن دايم يبون الكبيره
خلف بن مخمر الفهيقي - سكاكا
يا لشاعر اللي قال وصف البنيات
وفي وضعهن كل يحدد مسيره
صارت بنات وبالوظائف مهمات
لا تفوتك البنت العنود الاخيرة
نائف الطريس - القصيم
حييت يا راع البيوت الجزيلات
وباختصر والا المعاني كثيره
وعن البنات اللي ذكرتم شريفات
قلت المراتب واضحات المسيره
محمد بن دلموك الهواشله - الخرج
يا مرحبا باللي أبياته جزيلات
ولغزه مثل حد السيوف الشطيره
ولا ياصل للنجوم إلا أهل الشهادات
ومن ياصلها يمكن يقود المسيره
يوسف علي راشد - الرياض
عبدالله اهليل سلام وتحيات
بنيت لغز جيد بتعبيره
لقيت حله ما يبي له إمرادات
مراتب العسكر عساها وفيره
علي رشيد الرشيد - رياض الخبراء
هذا جواب اللي تمعن بالأبيات
بيوتاً تشوقك والمعاني غزيرة
والحل واضح ما يبيله مراوات
رتبة تجي لك والمراتب كثيرة
عبدالله حمود المحلسي - الرياض
يا مرحبا ترحيبه كبر ابانات
يالشاعر اللي كلنا نستشيره
ياللي حبكت اللغز بإتقان واثبات
والرتبة الصغرى تليها كبيره
خليف الحربي - الرياض
ياللي تهاجس بالرتب والعلاوات
الله يوفقك الدروب اليسيره
لغزك هذا حله ولا به مداوات
مراتب الخدمة ولا هي عسيره
عوض حبيليص الحربي - الخرج
يا مرحبا يا اهل النفوس العفيفات
ترحيبة ما جوبها كل خيره
والحل رتبه للعساكر مقيمات
يشتالها من فوق متنه سفيره
مقرن بن متعب الهرف - الرياض

كما توصل للحل نثرا كل من:
جارالله الشايع - حائل، علي فريح الشهيل - حائل، حمود عبدالعزيز السبيعي - الرياض، خلف رجا الشمري - الرياض، ناصر الهديرس - الرياض، منيف سعد الشريهي - الرياض، ظويهر عنيزان الشمري - الرياض، رياض ناصر الهديرس - الرياض، فالح غازي الحربي - رياض الخبرا، طلال الغاوي الحربي - القصيم، يوسف محمد السناني، دخيل الحسيني - الرياض - سالم عبد الله العرجاني.
لغز الأسبوع

كتبه/ صالح عمر المليحان من حائل ويقول:
انشدك عن ورع صغير ومعروف
زوله نحيف ونازل تحت قبه
الورع ما يسمع كلامك ولا يشوف
ولا هو بخيل النار دايم يشبه
نستقبل الحلول حتى مساء الإثنين من كل أسبوع على فاكس
4871070صفحة خزامى الصحاري - لغز الاسبوع