زفة عشوبة

يا الله يا المعتلي يا قابل التوبة
يا اللي لما ضاقت الدنيا تفرجها
ياخالق ابن آدم ويا غافر ذنوبه
يا ملتجانا لما ضاقت مخارجها
تفزع لبدو وطاها الوقت بحروبه
تبغا الجمالة لكن العسر محرجها
يا الله طلبتك بوسم تردف انصوبه
يمطر على ديرة كثرت حوايجها
وسم لاشافوه كل البدو فرحوا به
من قو سيله لامر الحيد يدرجها
يا محلا عقب سيله زفة اعشوبه
في دار بدو وسيعات مناهجها
تلقى النفل والخزامى طالع دوبه
ولا فاح ريحه على نفسك يعالجها
ويزين علمه من الطراش لاجوبه
ماهي بهرجة قفا كل يروجها
من نجد لقصى الجنوب الين مشذوبه
تلقى البدو راتعه من جود فارجها
وبيوتهم في خضار النبت منصوبه
وذيدانهم فالخلا تلقى مداوجها
وشعيرها لو كثر ماقيل كمهوبه
وحملات الاعلاف تبطي مع محرجها
وتسمع دنين المعنا يوم دنوبه
يجذب دنينه صحيح الناس واصنجها
في ربعة ضوها للضيف مشبوبة
والسالفة بينهم ما احد بيبعجها
والبن في وارد الرسلان مربوبة
واللي حمس بنها بالهون درجها
هذي طراة العمر من قبل مكتوبه
قبل النفوس يغذي فيها تشنجها

حمد بن ناصر ابو ظهير القحطاني