صوت الصورة

أشوف أنا رجل جلس عند تنور
ماسك بيده القرص بالنار يشويه
رجل نشيط بخدمة الناس مسرور
اللي سكن بالحي واللي حواليه
من كان والخباز بالحي له دور
وكلا يجيه الخبز من بين اياديه
ومنا تحية للمحرر ومشكور
خلا (الخزامى) كل قارئ تسليه
زبن مقبل العنزي  بريدة
يخبز الخبز صاحبنا ومهنته بايده
عقب ما قرب العده وحط العقالي
في زمان تضيع ابه النفوس البليدة
وبه يجدون من يبغون كسب وحلالي
للمكاسب مجالات وطروق عديدة
مير كل أيتلمس له طريق ومجالي
والله اللي يدبرنا على ما يريده
بايده الخير والخيره وإليه المآلي
ناصر  العنابس  محافظة سراة عبيدة
خباز ماهر يعتني بالعجينة
اقولها للناس شرق وغربها
مني شهاة حق يابوفنينة
تسلم يمينك يا بطل من عطبها
ضلك نظامي في القرى والمدينة
واعتز في نفسك وصافي كسبها
واحذر من الصحي تقع في يدينه
لا تنتكب روحك وتخسر تعبها
علي الزولاني
أسوق خبزي على ناري
وآكل من فعل يمنايه
ولاني بناشد عن الزاري
أنا ابخص بداي ورواية
العمر فترة وينهاري
ولاني مخلد بدنيايه
المرسل
نشمي سعود الحنيني   القصيم
جهّز عجينة وشب النار
للخبز ولَّع بتنوره
الما وخضره نخل وأثمار
وصوت المكينة وعصفوره
ما عكّرت فكره الأخبار
هذا هو الصوت للصورة
فهد بن عقيل الطويان  بريدة
الجوع حدة والرجل يبي يعتاش
ومن ينصح الرجال بلش ونشبه
آمل بذ دنيا واثرها على ماش
كم واحد ترفعه هم تخبط به
غيره سكن فله وهو يسكن عشاش
ماجت له الدنيا على ما يحسبه
ما كل من يبغى العلا منها ناش
ارزاق وافعال السبب مستحبة
غنام مسعود آل حويد القريني  نعام
حارت بي الفكرة وأنا قمت أصور
قمة فخامة شفتها في المخابز
اللبس والعدة وشغل امتطور
متعدي القمة طمر كل حاجز
احترت في شكله وراه امتكور
الناس بجنب الفرن والعود ناقز
من شاف شكل العود كنه يدور
يا ضب ولا شوك في صوف ماعز
متعب بن ابراهيم الغانم  الرياض
اعمل لنفسي كل ما هي تريدي
ما تشتهي من كل ما لذ أو طاب
بالبر في برميل دافنه بيدي
وبنيت طين لا يجي وسطه تراب
وأسوي آكلات بطعم فريدي
منتدي وخبز بالطعم سيل العاب
أيام تمر وكنها يوم عيدي
أيام تلم الشمل مع كل الأصحاب
علي غنام الغنام  رياض الخبراء
على الماضي اللي فات يرتاح انا بالي
الا يا حلو ذكراه تكفون خلوني
انا في بيوت الطين يا ربعنا سالي
وفي حبها ياناس بلحيل مفتوني
انا مخبزي عندي مع بريق ودلالي
قديم يحب اللي مضى لا تلوموني
وترى الجو ما مثله وانا اليوم يحلى لي
الا يا جماعة خير تكفون زوروني
محمد بن عبدالعزيز الخنيفر  أشيقر
ياماحلا الخبز ليصار تنور
من صاحب دايم يخبز بركاده
أنا اشهد اني على الهندي مجبور
خبزه تماتيك وذ القاز زاده
صامولي أو مفرود ليصرت محصور
والخبز الأصلي تركنا حصاده
اهوا من الحنطة ولو كان شابور
اول مع المجمار شفنا السعادة
محمد عبدالله المجلي  حوطة بني تميم
يا شيبة الرحمن شغلك لنا طاب
الخبز ناجض وكل فعلك طبيعي
ذكرتنا وقت تلاشى ولنا غاب
يوم الخبز يعمل بزين الصنيعي
واصبح يجينا خبزنا اليوم بالباب
في وسط كيس والمصانع تبيعي
وقت سريع ما حسبنا له حساب
يمشي سريع وكلنا له نطيعي
خالد بن ناصر المخيمر  روضة سدير
يالله يا قابل دعى كل معتاز
بالخير هيأ للوطن كل الأسباب
يا مشمر اليدين بالفرن خباز
وما احتجت طولا والبواقي لك ابجاب
يا زين طبخ النار عن طبخة الغاز
حيث الطبيعة ذوق لاصحاب الالباب
ورغم التقدم او جديرات الانجاز
تراثنا باقي وله ذوق واصحاب
سعود عائش التميمي الحربي