يا نجوم السماء

عبدالله بن جهز العتيبي

يا نجوم السماء تكفين وش هي علومه
علميني عن اللي سم حالي فراقه
غاب عني بعد صوب بقلبي سهومه
راح وأهدى عليه من عنا الوقت باقه
والهوى وقت في عالي حجاه ورجومه
واشتكى الحب قلبي والمشاعر رقاقه
والمشقا همومه بين شربه وسومه
كل ما هب نسناس يزيد اشتياقه
يكبر الهم في قلب تصافق همومه
كل ليله لها بين الضلوع اصطفاقه
يسهر الليل كله ويتفقد نجومه
صار بينه وبين السهر ولف وعلاقه
من يلوم المهاوي جعل ربي يلومه
أثر لوم المحب من الخلايق حماقه
راعي الحب يعذر لو يشقق هدومه
ينفتح له على الضيقات عشرين طاقه
غاض جوف البحر والبحر تسعين قومه
ساقه الخط في بحر المحبين ساقه
دام نفسك مع الأحباب ما هي رحومه
خل عندك مع أهل الحب ذوق ولباقه
ناس تعطى وناس فالحياة محرومه
من جفوه الأحبه عاش من دون فاقه
ول يا نفس ياللي من عناها ظلومه
لا تشيلين من حمل الليالي اطباقه
يمضي العمر كله بين ليله ويومه
والمعنا معنا ما ثنى عظم ساقه