بيت وصدى

الأسبوع الماضي كان بيت الأسبوع من طرح معد  الزاوية والذي يقول:

البرد توه والعقارب لها سم
لا لا يغرك قيض بعض الليالي

وكانت المشاركات كثيرة جداً جداً اخترنا منها:
احسب ونعرف باقي للشتا كم
ما تعرف انه باقي له توالي
وترى محرم حسب ضني ليانع
يكفيك عن نار الوجار الضلالي
جر الفراش وتحت نور القمر نم
وغطرف يصونك يالالاله يلالي
نواف حشر الحميدي العتيبي   الدوادمي

شبت ضوى من وراء الطعس لدهم
وانا اتذرى من هبوب الشمالي
الليل ضاري والسماء تو مذهم
حسبت قيض العام في ذا الهلالي
البرد نشف داخل عروقي الدم
وانا وراء نجران من ربع خالي
مسفر علي الوايلي

الجو يقلب واحذره لأجل سلم
اكثر دفاك ولاحظ اول وكالي
يأتي الصقيع ويلحقه قيض الأنسم
وبكل ساعة يصبح الجو خالي
ويعاودك هبة من البرد الأعظم
الحر عالي وأيضاً البرد عالي
عبدالرحمن علي قمع العولقي   الرياض

يا من يبيع الثوب بتراب قل ثم
لا تتبع الجفلان واسمع مقالي..
البرد يدخل في عظامك كما السهم
يدخل بلا دستور ولا يبالي..
اللي يريده ربنا لازم يتم
ما بين كاف ونون نقضه محالي..
أسماء عبدالله

ثقل غطاك إليا بردت ونم وسم
واضفه على نفسك وكل العيالي
نصيحه ينصح بها الخال والعم
واخوك واللي لك صديقاً موالي
عساك يا الغالي من البرد تسلم
ويسلم لنا منهو عزيزاً وغالي
زبن مقبل العنزي    بريدة

بايع عباته بالشتا عنه تعلم
قال المثل لا هنت صابه إهبالي
كم واحد ماله جدا وامتلطم
يرقل احنوكه لفح برد الشمالي
وابفروته والبشت هذا تحزم
بولد العجوز البرد ماله مجالي
فهد بن عقيل الطويان   بريدة

عزي لمن يسرن بجسمه مع الدم
دشت بجسمه وهو داله وسالي
يجرها حسرة وونه ويندم
وزاده يذوقه حر لو كان حالي
ويطيح بفراشه مريض من الهم
وهذا جزاء المهمل على كل حالي
علي غنام الغنام   رياض الخبراء

حذرى تفك الفروة اللي لها كم
وحذرى تفك البشت في كل حالي
هذا الشتاء باقي له ايام ترزم
باقي براده في هبوب الشمالي
لا تصير مثل اللي عباته لها لم
قال الشتاء ولى ولا له مجالي
مقرن بن متعب الهرف   الرياض

سعد بلع نوه علينا تنسم
هبت علينا نسمته من شمالي
قم هان كبش للشوارب يدسم
وحط الحطب بالنار ودن الدلالي
اطلق حجاجك يا لسنا في تبسم
الرزق لك مضمون والعمر بالي
بدر بن خلف الحزيمي

ذي حالت الدنيا أو منها نتعلم
لا يدوم كدر ولا غدير زلالي
ولا فرحة دامت ولا يدوم لك هم
دنيا تنوع لك على كل حالي
الرابح اللي من حياته تغنم
ما شتق بالدنيا وجمع الريالي
غنام مسعود آل حويل القريني    نعام

لا تقول جانا الصيف باكر تندَّم
واحذر ليا هبت هبوب الشمالي
انشد رجال العرف ومنهم تعلَّم
ولا تتبع اللي قيل فيه المثالي
اقول جاك العلم والحر يفهم
وخلك قريب النار حول الدلالي
محمد بن عبدالعزيز الخنيفر  أشيقر
بيت الأسبوع
كتبته: نوير عجاج الظفيري من حفر الباطن تقول:
العام راح وروحت كل الأخبار
يالله عسى نسعد بعام جديدي
نستقبل المشاركات لإكمال البيت بثلاثة أبيات بنفس المعنى وعلى نفس الوزن والقافية حتى مساء الاثنين من كل أسبوع على فاكس  4871070زاوية بيت وصدى صفحة خزامى الصحارى