الاخ معوكس ـ المحترم..تحية وبعد
ليش تشتكي من الرياض وليش ماتروح لمصايفنا الجميلة في شتى انحاء المملكة؟

ابويزيد ـ الرياض

حقيقة بعضها جميلة بس الاسعار تحرق القلب واذا اخذت (بزرانك) رجعت الرياض على (الحديدة) لا والمعزبة تحمل شناط (هدايا) على بالها (أصول) وهي في الحقيقة عادة تنفض الجيب وتخلي الرجال يقرر السفر وحيداً!!

الاخ العزيز ـ معوكس
ما هي آخر اخبار النجم الموهوب احمد خريش نجم فريق الاتحاد؟..

غازي سرحان ـ ينبع

حلم انه سجل قول وصار يتكمبس من شقته وما رده الا ابحر الشمالية والآن خلص الحلم والرجال صار يمشي على راسه!!

صاحب المليون رسالة
الذوق وخفيف الدم ـ معوكس
معقولة شهر (8) بيدخل وانت ما سافرت للخارج!!

خالد الصالح ـ البديعة

تعرف (اليخت) يبغى له توضيب مثل ما قلت لكم الاسبوع الماضي وشكلي ابرسل (ام العيال) تشوفه لعلها تغرق وارتاح منها لكن هذه صعبة والامل في (شاورما) من مطاعم الرياض تلعب فيها مؤقتاً وتريحني من لسانها هالصيفية!!

الاخ معوكس ـ المحترم
تحية وبعد .لماذا لا ترشح نفسك لرئاسة احد الاندية؟!

عابد الزيد ـ الرياض

رؤساء الاندية.. يمكن تصنيفهم على النحو التالي: رئيس يحب الرزة!!
وآخر.. يقدر الصورة!!
وآخر.. عاطل وهذا عمله!!
وآخر.. يتفشخر عند ربعه!!
وآخر يحب العمل وخدمة الرياضة وهذا نادر جداً في هالوقت!!

الاخ معوكس ـ المحترم
تحية طيبة وبعد
انت رجل خبير وذو نظرة ثاقبة.. هل تتوقع الاثارة والندية في الموسم المقبل خاصة وان الفرق استعدت مبكرا للنشاط الكروي...

عالي ابوملحة ـ المنطقة الشرقية

شف يا عالي طالما ان (الاداريين) يحكون ويصورون اكثر من اللاعبين فلا (ترجي) خير وطالما ان الاجانب من ماركة (الكاتو) وجماعته والمدربين من (رحالة) الخليج فلا تتفاءل ابداً... بصراحة الوضع محزن والاندية معظمها تدار (بعقول) سطحية يهمها (الترزز) وتلميع اساميها لتسليك امورها الخاصة ـ لذلك انا شخصياً ما عندي استعداد اوجع راسي بكورة بطيئة وضعيفة والا فضل لمن يركض اكثر!!

الاخ معوكس
اروح لمين كلمات (مين) والحان مين..؟

ابويعقوب ـ جدة

اروح لمين اعرف اللي ملحنها (بديع مسعود) والكلمات يمكن تكون لمخاوي الليل!!

عزيزي معوكس ـ بعد التحية
مارأيك بالقصة اللي مسويها النجم بيكهام. وهل تنصحني ان اسوي زيها

محمد العبلان

من زين شعرك حتى تسوي (قصة) انا انصحك تحلق (صفر) ترى اللي فيك مهوب(قشرة) وصخ من كثر (التايد) وكرهك للشامبو!!

الى ابوالعواكيس ـ المحترم
بصراحة يا معوكس الالمان ما قصروا علينا اربعة في الشوط الاول واربعة بالشوط الثاني..
وشكراً

محمد ابوعلي - فوزان الفوزان

ـ بنردها لهم ان شاءالله (2006) وجاكم الاعصار يالألمان!!

الصديق معوكس:
هناك من يحاول التشكيك في قدرات النجم الجماهيري لكبير سامي الجابر، كيف ترى هذه النفوس المريضة والى اي درجة وصل بهم الحقد والحسد... اللهم لا شماته

عمر الحديثي ومحمد النذير ـ الرياض

شف يا عمر ويامحمد.. نجم يتندح في باريس واسبانيا وجنيف وفريقه يدور من يسجل.. اغسلوا يديكم منه ويا حسافة على هلال يتنكر عليه عياله.. واحد ينحاش من المعسكر وآخر في اوروبا  3شهور بسبب (صمّام) الزايدة!!

الاستاذ العزيز معوكس ـ حفظه الله
تحية خاصة من القلب..
ترجم لي معنى (الحياة بدون حب) كالرز بدون ملح؟

خالد المبارك ـ الخبر!

الحب هالايام معناه (معك فلوس) تنحب وترزّ نفسك في الاستراحات والمجالس اما الحب اللي تدور عنه انتهى والطفران شفه يدور مع اهله في الاسواق من (الهبال) لكن انا شخصياً اعيش قصة حب مع ام العيال وصدقني يا خالد اترك عنك حب (الغزل) والتلفونات والعاكس ومالك إلا الزواج

الاخ معوكس ـ المحترم
مرحبا... الف
هل تتوقع نجاحا مبهراً لدورة الصداقة الدولية؟

ابوشافي ـ المحالة /عسير

والله مواريها تقول انها ناجحة بس المهم الحكام لا يخبصون الدعوة.. وبعدين ابسأل ليش انديتنا ما تشارك في مثل هذه الدورات.. وفرصة الاداريين (المستفيدين) من الاندية يشخصون في فنادق (5) نجوم وبراد وسعة صدر!!

الاخ معوكس
كيف الحال...
من ترشح مدرب للمنتخب الوطني الأول؟!

سامي السعيد ـ الرياض

ابغي مدرباً صاحب شخصية يختار بعينه مهوب يخط له تشكيلة كل (الاذواق) ويقولون له الجود من الموجود!!
والمهم نصبر عليه.. بس مهوب اي مدرب يجيبونه.. نبغى مدرب عمله كبير وخرطه شوي... لاننا ملينا من الخرطي وكثر الوعود في المطارات!!

الاخ معوكس ـ تحية خاصة
بحسك الفني... ما هو احسن البوم غنائي صدر مؤخراً؟!

العبقري ـ مخاوي النهار

أنا اذا شفت الاعلانات في الجرايد لمطربين واشرطتهم الجديدة طرت مثل غيري (لاستريو) ابغى اسمع فن والنهاية.. قرقعة والطرب يمين وهم شمال.. لكن ربما يكون الرويشد وعبدالمجيد وفقا الى حد ما.. بس تبي الشور تبغي طبلة اذنك (تعمر) لا تسمع غير فيروز وهاني شاكر وكاظم في بعض القصائد.. وغيره طربق.. طربق!!

عزيزي الدكتور معوكس
اين زاويتك الاسبوعية ولماذا توقفت رغم انها حلوة وظريفة وفيها خفة دم!

سعيد البدر ـ الخرج

انا مهبول اكتب (اسبوعياً) وسط جيش هالكتاب اللي صاروا مثل محلات كل شيء بعشرة.. والساحة صارت مليانة من ماركة (بقلم) لذلك انا يكفيني (الجمعة) ونصيحة لكتاب 2002م اقول لهم ما كل كاتب (كاتب) وبقلم هذه يبغى لها سنين والدعوة مهيب ساحة انترنت والشرهة على رؤساء الاقسام اللي يمنحون الفرصة لمن هب ودب.. والآن اذا لم تجد عمل فاتجه للصحافة الرياضية حتي يرزقك الله!!