تحت ظل الحداثة

أنا ياهل المعاني شفت لي بنت تهل دموع
بحال شين محتاره مع الصدقان وعداها
وقفت وقلت يا بنيه ورى وسم القهر مطبوع
على وجهك علاماته بكل هموم شفناها
وقالت حالتي يرثى لها واشرح لك الموضوع
ديار محصّنة وشلون كل دشّ بحماها
من أول لي عشّاق بقلبي حبهم مزروع
وأساميهم كما العنوان لي والكل يقراها
رجال عاشقوني عشق وأنا راسي بهم مرفوع
ولكن البلا ناس تبيني مار ما ابغاها
تبلوني وانا والله معهم ما مشيت بطوع
وعلى وجهي علامات العصابه بان معناها
وعنهم قيل شعّار كبار وشعرهم مسموع
وبعضهم ما يفسر لك بيوته كيف سواها
وقلت الصبر طيّب يالحبيبه والخطا مرجوع
على ناس تقبّل شعر ناس كحلها أعماها
تحت ظل الحداثه شعرهم ما ينعرف له نوع
لو ان للشعر رجلين هرب عنها وخلاها
وانا ما عم شعّار الحداثه والحيا متبوع
أخصّ اللي بيوته من هزيل القول عبّاها
لكن عيشي على ذكرى رجال شعرهم ينبوع
قراح به  تساقا الناس من أولها اليا تلاها
ولك عنهم عزا في بعض شعّار لهم مجموع
شهادات بكل إعجاب بين الناس تلقاها
خلاص أرضي بقولي والزعل يا بنيتي ممنوع
تراك أنتي بنية فكري المحتار ما نساها

شايع شاهر الحربي - بريدة