الحلم

البارحة ملايم الطرف للطرف
اقرا همومي وسط حلما وعيته
اقرا سطور الحلم حرف ورا حرف
حتى ثقيل الهم منها بنيته
راح الصديق اللي ليا حدني ظرف
منصا ويقضي لازمي لا نصيته
واصحابي اعرفهم على كامل العرف
ولكل منهم عارفا وش حتيته
عز الله إني صارف نيتي صرف
مالي ومال الهينه والبهيته
رزقي  على الله ما زرفت البشر زرف
محي العظام الباليه عقب ميته
نفسي عزيزه لو كرفت الدهر كرف
واعاصر صدوفه وعلما نويته
لو في طريقي شايك الشوك والجرف
لاكب محسوب الرخامة وبيته
مهوب حلف ولا جبرني على إن أرف
يبقى الضعيف ضعيف عيب عن نعيته
أنا رفيقي مثل جماً ذرف ذرف
جماً يروده من يقدي مطيته
اللي غرف علم الوفا بالوفا غرف
انا اشهد انه طيب في حميته
ولا هوب يدرف غيبت المقتفي درف
إلا بعلم الطيب يذكر مزيته
يمناً بلا يسرى تصافق بها الشرف
هذي بلا من بان هذي بليته
حالي قضى واسرف بي الوقت واسرف
تقول عذالي على آخر نسيته
يا لايمي قافي بنيته على ارف
وازن بيوته واختمه واهتويته
تمت صلاة مصرف الكون صرف
اللي بعث رسله وعمت وصيته
عايد بن عايض العتيبي