ذكرى

جلعود لافي الشمري

ذكرى بها منها على النفس توضيح
على زمان راح واقفت ركابه
راحت ركابه مع سراب الصحا صيح
تسابق الفرقاء تبي شمس غابه
ما فوقها غير الهموم المدابيح
وهواجس ما غير قلبي درا به
اكنها ما قلت لو يوم تلميح
على الصديق وعن جميع القرابه
حفظتها ما اعطيت بالسر تصريح
عن ما يسر الحال وإلا التهابه
بيني وبين النفس واحزاني اصيح
اطرح سؤالي ثم اقول الاجابة
يا مشرّح قلبي وأنا حي تشريح
وافكار من شانك كثير حسابه
انت المطر والغيم والريف والريح
وعلى منك عن حب غيرك رقابه
وعندك لروحي والضماير مفاتيح
ولا غيركم قلبي حبيب غدا به
ومن دونكم طال المساء والمصابيح
والكبد يا كثر العطش والضماء به
حبي من اجلك به خسرت المصاليح
والحب بلوى كل حي ابتلا به
شكوه وافين الرجال المفاليح
وكم فارس من حيرته عظ نابه