بيت وصدى

إعداد-عادي الشمري

اتحفنا العديد من الشعراء بالعديد من المشاركات عبر هذه الزاوية التي وجدت صدى وتجاوباً كبيراً من القراء في إكمال بيت يطرحه أحد القراء الشعراء بثلاثة أبيات فقط وبنفس الموضوع الذي نأمل ونحب أن يكون موضوعاً هادفاً ونافعاً.
والأسبوع الماضي كان البيت المطروح من الشاعر: عبدالله فنيس القحطاني من الرياض والذي يقول:
الشعر له يا ناس منهج وقانون
واشوف ناس في نظامه عثوبه
وقد كانت المشاركات كثيرة ونعتذر لعدم نشر ما لم يصل لمستوى النشر ونأمل بالمحاولة:
لاقاف لامعنى ولاهوب موزون
ناسٍ بلوه إبجهلهم و إرثعو به
يااهل الشعر ياليت وضعه تحلون
في طرد جهال عليه إ محسوبه
في نشر شعر تكتبونه يضيعون
والناس تكشف زيفهم لا حكوبه
فهد بن عقيل الطويان . بريده

منهج نظم حكمة على القاف موزون
يبقى ويحفظ منهل له عذوبه
واللي عثوا مثل العمى مايشوفون
مسكين من هو تايه في دروبه
عادي وغيره من غثاهم يعانون
عواصف غبار يثيره هبوبه
علي غنام الغنام. رياض الخبراء

أنا لبعض الشعر ماني بممنون
مارتاح له من يوم الاحن اسلوبه
باسباب ناساً مع طريقه يهيمون
مايفهمون السالفه ولعبوبه
والشعر له مبدأ ومعنى ومازون
وليا فقد معناه ما سولفوبه
حمد نزال العتيبي

الشعر يبني كنه الجدر موزون
مايقبل الميله صعيب ركوبه
فكره مع معنى وقاف له افنون
وبحور اللي منهل الفكر صوبه
موروثنا غالي وواجب له انصون
الين يصير امطرز الدر ثوبه
مقرن بن متعب الهرف. الرياض

لاصار ماني عارف الشعر بفنون
باترك قصيدي وأعطي الشعر ثوبه
الشاعر اللي لا لقا القاف بيمون
على الشعر يمون ويسلك دروبه
يعرف معاني كلها في حشا الكون
ويعرف دروب صادقات وكذوبه
خلف بن مخمر الفهيقي.سكاكا

إن كان في اشكالاتنا تستطيعون
لاتنشرونه واضحات عيوبه
لاتقبلونه غير جيد ومازون
لاتقبلونه لا بس غير ثوبه
حتى ينال المستوى اللي تريدون
ويستر به من في الجرائد قروبه
بند بن تركي الشيباني

واصبح جزيل الشعر بالسد مسجون
يموت في سجنه يخاف العقوبه
يخاف ناس ما يعرفون  وش لون
يطوف معنا طيبه مادروبه
خلوه ياهل الشعر بالسجن مرهون
وقبره بعد يموت شيلو نصوبه
بدر بن خلف الحزيمي

أدلو عليه وصار من غير مضمون
بعقولهم وفكارهم عزرو به
وأهل الحداثه شعرهم غير موزون
ولا هو مقفى شعرهم كسرو به
والشعر له ميزان وحدود وفنون
وبحوره أعراض أوطوالن دروبه
عبيدالله هارب الرشيدي . الخرج

نبغى جزيل الشعر منقي وموزون
وأيضاً المعاني المهزله لا تشوبه
شعر النبط في بعض الالفاظ مفتون
تكفون ياشعار فوق ارفعوا به
ترفعوا به ياهل العرف تكفون
لا تتركونه للمها وي جلوبه
ناصر آل مطر السنحاني- محافظة سراة عبيده

لومه على شعاره الكفو وشلون
يدرون عنه وكنهم مادرو به
حتى ولو قالو مقفا وموزون
لاهوللمعنى ولا هوب صوبه
هذا الصحيح وقولو اللي تقولون
وكلن على طول ابدنه قوس ثوبه
علي بن ثابت القحطاني

لو ينظمون الشعر ما هو بموزون
والقاف مكسور وهم ما دروا به
ولو ينظمون الشعر ما هو بموزون
شعر بلا معنى ولا به عذوبه
يبغون مما يكعبونه يسمون
شعار لو هم جاهلين بدروبه
فهد غلاب العمري. الدمام

بيت الاسبوع

كتبته  "عانس" من الرياض وتقول:
المهر غالي وسبب لي عنوسه
راح عمري والمهر ما أحد قوى له

نستقبل المشاركات على فاكس:
4871070خزامى الصحاري - زاوية بيت وصدى - ونأمل الا تتجاوز المشاركة ثلاثة أبيات فخير.