بيت وصدى

إعداد: عادي الشمري

الاسبوع الماضي كان طرح البيت من الشاعر زهران المطيري الذي يقول:
لولا اختلاف الذوق بين المخاليق
بعض السلع بارت ولا حدٍ شراها

وقد كانت المشاركات لاكمال البيت بثلاثة أبيات اخرى كالتالي:
زهران عون الله لعب له طواريق
فيها معاني غاليٍ مشتراها
قول صحيح صدق ما فيه تلفيق
وسط الجريدة كل واحد قراها
في كل دور اسبوع مع فكة الريق
تسعد عيون اللي بعينه يراها
ابراهيم بن مسمار القحطاني - الرياض

يا ذيب يالي وقت في قمة طويق
قلي عن اخبار العرب وش وراها
جب الحكم لي من رجال مطاليق
يقيمون السوق هم اخبراها
عراف وقظان تسد الاراويق
غيث على ضيفانها وقصراها
بدر بن خلف الحزيمي

الذوق سر امسطر بالصناديق
والنفس لا اختارت ظهر ما وراها
بعض البشر نظراتها بالزباريق
وبعض البشر كل البساطة هواها
وترى اختلاف الذوق فيها مرازيق
وكل السلع متوافر مشتراها
متعب بن ابراهيم الغانم
زهران نسق مبتدأ البيت تنسيق
بيت السبوع وكل قاري قراها
جاب الحقيقة صح ما فيه تبريق
يحكم على مضمونها مبتداها
ويالله في درب السنع والتوافيق
وعنا المشاكل والهموم تحداها

حمد نزال العتيبي - الرياض

ولولا الحكم فالشعر ليس الطواريق
لحد كتب فيها ولا أحد قراها
ولولا الفرج محد صبر ساعة الضيق
ما فيه ضيقة غير فرجة وراها
ولولا غروب الشمس بعده تشاريق
كل ينام بليلته ما سراها
نايف سمار الشلاحي
الرياض
ولولا صواديق العهد والمواثيق
كان الامانة ضايعة من لقاها؟
الله يبارك في الوجيه المطاليق
والكلمة الزينة لمنهو بداها
واليوم يا زهران غن الطواريق
واللي يمد الكف يأخذ ملاها

مازن ماثل العوني
الخرج
وكل على رايه ولابه توافيق
والناس تمشي دربها في هواها
واحد على ما قال فكر وتنسيق
يمشي بحكمه في دروب مشاها
وترى مزاج الناس ما به تطابيق
اقول يا زهران صعب رضاها
محمد بن عبدالعزيز الخنيفر
أشيقر
البيت وافي ما يبي أي تعليق
والامثلة فالذوق للي بغاها
بعض الجرايد سوقها قمت طويق
وانا وغيري من البشر قد شراها
وبعض الجرايد ما لها أي تسويق
ولولا اختلاف الذوق ما حد قراها

عالي بن فالح العتيبي

هذي اطبوع الخلق غرب وتشريق
كل برايه مقتنع وايتباها
حتى بفعل الخير والشر تفريق
وقليل ناس تعترف في خطاها
وناس على فعل الجمالة مشافيق
وان عاضبت يغنيك حالي نباها

فهد بن عقيل زايد الطويان - بريدة

ربي مفرقها على الخلق تفريق
كل حال فيها وصف غيره نراها
وبعض البشر بالوصف علقم على الريق
والبعض بلسم للجروح وشفاها
وما اختفى يظهر لنا حزة الضيق
ويبين ما في جعبته محتواها

علي غنام الغنام - رياض الخبراء

هذا كلام صدق ما هو تلافيق
لكل نفس ذوق يطغى علاها
ما كل عمرك يابن آدم توافيق
ودنياك لو طالت قصير مداها
لا عاش من هو خاين للمواثيق
والناس ما تقدر تحقق رضاها

يوسف بن منصور الميموني
الرياض
والرزق عند اللي بيده التوافيق
نفس حرمها الله ونفس عطاها
والعبد لو يمسي على الحمد ويفيق
اخير من دنيا كثير شقاها
يذخر ليا منه على موقف سيق
تجارة بالعرض يقطف جناها

محمد بن معتق بن صخيبر الحربي - عنيزة

وقت به الشاعر بدعله طواريق
مما تشوف العين زادوا عناها
ناس على شري البضايع مطافيق
والجهل يلحق بعضها من عماها
اسبابها التقليد من دون تفريق
من غرب جتنا يقطع الله مداها

ابراهيم العريفي
عفيف
كل البشر ما بين غرباً وتشريق
بأذواقها متخالفاً مستواها
كلاً على جمع المكاسب مشافيق
والناس تعرف ربحها بمشتراها
أحداً يجي ذوقه بحسن التوافيق
واحداً تبور بضاعته من رداها

زبن مقبل العنزي
بريدة

بيت الاسبوع

من طرح الشاعر فهد مطلق الدوسري من الرياض ويقول:
ليه القطاع الخاص ما يسمع الشور
ويشارك الدولة بحل البطالة

نستقبل المشاركات لاكمال البيت المطروح بثلاثة ابيات فقط حتى مساء الاثنين من كل أسبوع على فاكس  4871070خزامى الصحاري زاوية بيت وصدى.