بين الجسور

لو كثير الهم تنقله السطور
ما لقاله وسط خفاقي مراح
ما دفعني للشعر حب الظهور
ولا حلمت القى على صدري وشاح
بس اهدي كل بركان يثور
يستريح القلب وألا ما استراح
الحناجر تشتكي منها القبور
والظروف تزيد فالقلب الجراح
يغفر الله والبشر ما هو غفور
والحظيظ اللي نفث همة وباح
الوفا للناس تحفظه الصدور
يا صدوراً علمتنا الانشراح
للحلم قصة يرددها الفتور
وقتها طول وطالبها الكفاح
في ثناياها زهر واجمل عطور
ووجه فتنة صد عن وجهي وشاح
وأنت ياللي تمتحن قلب صبور
غرك بقلبي عدوله والسماح
علمك وقتك على مثلي تجور
زان لك في خافقي ضرب الرماح
ما دريت اني بشر دمه يفور
ما انخفض للذل في صدرة جناح
للوصل كم لي وأنا ابني جسور
كل جسراً تكسره هوج الرياح
ما لقيت بصدرك لودي حضور
ولا لمست لجيتي زود ارتياح
كيف ما ودك يطيرن الطيور
لا نكرن صوتك وظمين للقراح
جيت لك يوم الثرى ينبت زهور
ورحت يوم القاع للذنب استباح
باعتبر ما صار لي طيف يزور
او حلم ليل ويقتله الصباح
سعود بادي