طلعت للصحرا معي جمس صالون

اسلي الخاطر وشم الهبوبي

واثر المواتر بعضها يمكن يخون

طعوس نجد مالها إلا الجيوبي

ناصر بن جمعان آل عوض - وادي الدواسر

الجمس غرز في رمال النفودي

جمس قديم وعذب اللي يدفون

جمس قديم بس شاص وبودي

وباقي حديده داخل الرمال مدفون

عقلا خزن الخمشي - تبوك

ياللي على الطاره وربعك يدفون

حول ونقص من هوا التايراتي

كانك تبي الصالون يطلع افبلهون

وخفف على البنزين واسمع وصاتي

علي الغنام - ثادق

الجمس غرز وركابه يدفونه

زايد هواه السبب ياسايق الطاره

والصيف موته عطش وانتم تعرفونه

ياماشي البر خذ قربه ومطاره

فهد بن عقيل الطويان - بريدة

ياما حلى البر لو كثرت صواديفه

لاصار وقت الضحى في غب وسميه

المشكله موتراً تعب مجاديفه

يقول روحوا على الاقدام رجليه

لطيفه بنت محمد العبدالرحمن - الرياض

ماهوب ذنبي يوم أنا اليوم غرزت

مافي دبل والسايق احمى عليه

لوني مصمم للرمل كان تجاوزت

ارض النفود اللي سفوحه عتيه

خالد بن ناصر المخيمر - روضة سدير

مصنعه سواه للخط السريع

وش تبي ياصاحبي وسط النفود

اشهد انه بالدبل قدم شجيع

حي فال الجمس طب للكبود

محمد عفار المطيري - عنيزة

دربك مع السكة وعنك الصحاري

مانتب قوي تلحق ملاحيق الابطال

ذي شغلة للجيب والا السفاري

اللي لهم بالبر طلعه ومنزال

عبدالكريم النغيمشي - الربيعية

ياللي تخاطر في حياتك ودنياك

تضرب دروب كلها زبر واطعاس

حط الدبل جنبك صغير بيمناك

واحذر قبل ما ياقع الفاس بالراس

عبدالمحسن محمد المحيسن - رياض الخبراء

يحسب انه شاص يوم انه يغوص

مادرى ان الشاص دربه موسهل

اتصل بأبو علي ياتي قحوص

كالسحاب اليا ترزم والبرد منه استهل

محمد بن فهد الجلعود - سميراء

ياقاطع الفرجه ودربك تغاريز

خلك مع الماهول تاصل على خير

سالم وتسلم من جميع اللعاويز

حتى ولو طاول بك الوقت والسير

صالح عبدالعزيز السويح - روضة سدير

ياصعب هالموقف وانا اقول تعجيز

من غرز الصالون في هالحراره

سواقنا ما همته هالتغاريز

مادامنا نتعب وهو في الغماره

عبدالعزيز بن علي البواردي - شقراء

ياما حلا رزت الصالون

لو هو في بر يدفونه

عند العرب شامخ مزيون

واهل المواكب يجيبونه

سعد الحماد - روضة سدير

الجمس غرز والنشاما يدفون

والكل منهم قام ينخى رفيقه

بأرض خلا ما فيه ناس يمرون

واسبابها السواق ضيع طريقه

عبدالله سعد الفهيد - الزلفي

معقول جمس بدبل غرز بسواقه

اكيد سواقه اللي ساقه عليمي

لجله توهق معه اصحاب ورفاقه

صدفونه يدفونه اللي هم معازيمي

سعود بن سعد الحافي - الرياض

موترك جيد ودفعه زين

وشلون صرتوا تدفونه

هذا مواريه دفرنسين

ليه الدبل ما تفرونه

عبدالكريم عبدالرحمن السلوم - القرائن

إن كنت ناوي على التطعيس

موترك لابد تغييره

عليك بالربع أبوتقويس

يجلي عن الوجه تكشيره

بدر مرضي الحربي - المدينة المنورة

ياسايق الموتر عطه زود بنزين

لا لاتوقف حيلنا حيل طاحي

وانزل وخلك ربنا جعله يعين

ماكل سايق دايم الدوم صاحي

نايف حمود النافع - الزلفي

الجمس غرز قال هذا مكاني

وقام يتنخى راعي الجمس ياعيال

اجداد كم يوم الرشا والسواني

افعالهم يشهد لها كل رجال

زياد عكروش الضويلي - حائل

جمس جديد مغرزاً فالصحاري

مير البلا ان كان خلص وقوده

وده على الفكسار قبل الغداري

يطلعه لو كان كثرة نفوده

خليف الحربي - الرياض