عندما عاد الأب من صلاة المغرب في أول أيام رمضان المبارك واتجه كعادته إلى الصالة التي اعتاد تناول طعام الإفطار فيها مع أفراد أسرته كل عام لم يجد أحداً من الأبناء والبنات وعندما نظر الى الاطباق وجدها شبه خالية الا من قليل من الاطعمة تكفي لشخصين عندها دخلت الأم فسألها الاب ( وين العيلان ) قالت لقد اخذ كل فرد منهم حصته من الطعام واتجهوا الى عدة غرف، فخالد ونورة في غرفة نورة، ومحمد وسعد في غرفة محمد، أما عبدالله وسارة ففي غرفة سارة والباقون في الصاةه اللي فوق .
قال الاب خير ان شاء الله ليه كل اثنين في مكان وكيف يتركون المكان الذي نجتمع فيه بعد كل مغرب كل عام لنتناول طعام الافطار ومشاهدة التلفزيون .
قالت الام المشكلة أن كل اثنين يبون يشوفون شي غير الثانين علشان كذا خذوا فطورهم وتفرقوا، قال الأب الله لايفرقنا حنا في رمضان نبي نجتمع ماهو نتفرق خليهم يجون لا أقوم عليهم بها العقال
عاد الجميع وهم يحملون أطباقهم وسألهم الاب خير إن شاء الله .
قال خالد أنا ابي أشوف طاش ومحمد يبي يشوف سكتم بكتم ولأنهم يجون في نفس الوقت قلنا بدل مانتهاوش كل واحد يشوف اللي يبيه على راحته وقالت سارة أنا أبي أشوف مزحة برزحة
والباقين يبون يشوفون بيني وبينك قلنا بدل مانتهاوش كل واحد يشوف اللي يبيه على راحته .
قال الاب بس انا ابي اشوفكم حولي وبنشوف التلفزيون سوى .
قال خالد اشلون وحنا ماحنا متفقين على رأي واحد.
أجابه الأب نتفق ... ليش مانتفق ؟
وش رأيكم كل يوم نشوف واحد منا وواحد منا
أجابوه بصوت واحد: لا ...
قال: وش رايكم نشوف اللي ماينعاد الان، واللي ينعاد نشوفه في الاعادة قالوا لا ... اشلون نأجله وحنا لازم نتناقش مع أصدقائنا في اللي شفناه .
قال الاب: ياربي وش هالبلشة اسمعوا ياعيال انا اهم ماعندي اننا نجتمع على سفرة واحدة ونشوف شيئاً واحداً ... قالت صغرى البنات يبه حنا نقدر نشوفهم كلهم في نفس الوقت ....
صاح الجميع كيف ؟
قالت نشوف واحد واذا جت الدعايات نروح نشوف الثاني وش رأيكم ....
صاح الجميع لا .... اشلون نقعد نطامر من قناة إلى قناة ....
اجابهم الاب: أنا مع رأي اختكم .... يا نطامر يا نتفق ....
قالت الام: اسمعوا ياعيالي لو تبون تشوفون كل اللي في التلفزيونات ماصليتم ولا صمتم ولا قريتم قرآن ولانمتم بعد بعدين وشوله مستعجلين ترى اللي في قدر رمضان يطلعه الملاس طول السنة .
تدخل احد الابناء وقال وش رايكم نشترك في انفجن تي في نسجل وبعدين نشوف ...
قال محمد: المشكلة ماهي في إنّا مانشوف، المشكلة اننا نبي نشوف الشيء الآن ماهو بعدين
احس الأب بأن الجو متوتر فقال: اسمعوا ياعيالي هداكم الله انا اللي اهم عندي اننا نجتمع على سفرة واحدة تدرون ان ها الجمعة الرمضانية هي اللي جابت فكرة انتاج الاعمال في رمضان أما أن تتحول الاعمال اللي ينتجونها علشان تجمعنا الى أنها تفرقنا فهذا اللي ماني سامح به
وابيكم تسمعون قراري النهائي .. انا قررت كل يوم نصوت على اللي نبي نشوفه واكثر الاصوات تغلب يعني ياطاش يا سكتم يا مزحة يابيني ... هاه وش رأيكم ؟
قال خالد وهو الاكبر يبه ورى ماتخلينا على راحتنا .....
قال الاب معصين إن كانت راحتكم تشوفون اللي تبون فراحتي اني اشوفكم كذا على مائدة واحدة وعمل واحد، عاجبكم عاجبكم ماهو عاجبكم ننتقل الى الاقتراح الثاني
صاحوا جميعا اللي هو
قال: صكوا التلفزيون ..
1
:)
ماضي الماضي تقبل الله طاعتك...حديث أسري شيق يحدث في كل البيوت :)...
ولكن في البداية كان الأب ديكتاتوري عندما قال ( خليهم يجون لا أقوم عليهم بها العقال )...وبعد لحظات إنقلب الأب وأصبح ديموقراطي من خلال حديثه مع أولاده :)...عندي حل ليه ما تجيبون التلفزيونات اللي بغرف العيال وتحطونها كلها بالصالة وكل واحد يشغل اللي يبيه :)...الله يهديك يا ماضي بكل غرفة حاط تلفزيون :)...
تقبل الله صيامك وقيامك
كويتي بالصميم - عضو
03:18 صباحاً 2010/08/15
2
كل بيت سلوك اولاده حسب التربيه كما قال الشاعر. وينشؤ ناشئ الفتيان فينا على ماكان عوده ابوه
ابن النفود - عضو
03:28 صباحاً 2010/08/15
3
اي والله صكوا التلفزيون وتفرغوا للعبادة..
هذا هو الحل السليم
ابو عبد الله - زائر
03:31 صباحاً 2010/08/15
4
حلو المقال ^_^
تدري عاد.. و لا واحد من هالمسلسلات اشوفه ^_^
ظل آخر - عضو
03:40 صباحاً 2010/08/15
5
وهو صادق صكو التلفزيون وريحو
جود - زائر
04:18 صباحاً 2010/08/15
6
قصه رائعة
قراقوش - زائر
04:19 صباحاً 2010/08/15
7
اي والله سسسكرو التلفزيون..
مآآعتقد إنو في مسلسل او برنآمج..
يستآهل إنو نضحي بلمه الاهل وجمعتهم..
تفاااحه - عضو
04:30 صباحاً 2010/08/15
8
ههه
اسلوب رائع والأروع الهدف والفكرة
ع.م الدمام - عضو
04:37 صباحاً 2010/08/15
9
والله التلفزيون بلشه والسلسلات يا كثرها وكلها نفس الممثلات مثل زوارة خميس نفس ممثلات اميمة بدار الايتام الله يعين
الغلا - زائر
04:38 صباحاً 2010/08/15
10
ههه صادق كلهم في وقت واحد ما صار
أمير بأسلوبي - عضو
04:42 صباحاً 2010/08/15
11
صباح الخير
موضوع حلو,, المشكله فعلا موجوده في اغلب بيوتنا للاسف
وفي كل سنه تقريبا ,, صعبه حكايه نقفل التلفزيون قصدي مستحيله خاصه للاطفال والمراهقين بس اتمنى من الاهل مايتركون اولادهم يتخبطون بين القنوات من المغرب والى الفجر
خذوا بايديهم ولو بعمل الشي اليسير وذالك بالارشاد والمديح.تقبل الله منا ومنكم
نجوى الرياض2 - عضو
04:43 صباحاً 2010/08/15
12
اول مره اقرأ مقال بالعامي في هذه الجريده..
انا اكتفي بالجمعه مع عائلتي وقت الافطار والسحور..
وبعد صلاه المغرب الى الان لم تستقر عائلتي على مشاهده شيء معين..
الا اني استغنيت عن المكوث معهم في هذا الوقت
لانه وبكل بسآآطه لااشاهد التلفاز في رمضان..
والمسلسلات الخليجيه عموما لااشاهدها لافي رمضان ولا في غيره..
رمضان غيٌرنا..
المحاميه اعرف حقوقك - عضو
04:43 صباحاً 2010/08/15
13
جميل المقال يابوحمد
وانا اكيد ابصوت مع ساره اللي في المقال واقول
مزحه برزحه الافضل هذا العام على الاطلاق
فهد - زائر
04:50 صباحاً 2010/08/15
14
من جد صكوه!
لحن كأيام الخريف - عضو
05:01 صباحاً 2010/08/15
15
قل لأبوهم شل التلفزيون من بيتك
وبعدين أنصحهم
عبد الكريم - زائر
05:08 صباحاً 2010/08/15
16
ههه
ابدعت يا استاذ
NOODY - عضو
05:09 صباحاً 2010/08/15
17
ههه
"قال: صكوا التلفزيون.."
أفضل حل لضمان صيام نقي !
اللهم أعنّا على صيام وقيام رمضان.
orphan beauty - عضو
05:10 صباحاً 2010/08/15
18
اي والله صكوه ولاحقين على المسلسلات واذا ملزمين تلقونها بالنت بعد كم ساعه من عرض الحلقة
وش حلوها الجمعه والسواليف وسعة الصدر
مجنون فيك - عضو
05:16 صباحاً 2010/08/15
19
الله يرحم الشيخ الطنطاوي كنا نتابعه في الفطور
ام فيصل - زائر
05:18 صباحاً 2010/08/15
20
ههه اقسم بالله كأنك تتكلم عننا ههه اثاريه العالم يعيشون نفس الموال ههه
الله يبلشهم زي ماابلشونا مانهتم طول السنه ويوم جا رمضان انهبلنا ماندري وش نشوف وعلى قولتك بعضها تجي بوقت واحد وبس يجي الفاصل الإعلاني طمرنا عالقناه اللي بعدها ههه
الله يهدي ويصلح الجميع
اسعد الله صباحك
أكثر من رأي - عضو
05:38 صباحاً 2010/08/15
الارشيف | اتصل بنا | خدمةRSS | النسخة الكاملة | الإعلانات المبوبة