الرئيسية > خزامى الصحارى
صوت الصورة
البل مكانه بين عذفا ولينه
ترعى النصي ما جت على الشارع العام
منظر حزين.. وحالة البل حزينه
سفينة الصحرى لها وقتها ضام
جلعود لافي الشمري - حائل
اللوم يا وضحى يوجه لراعيك
أنا أشهد إنه فيك ما خاف ربِّه
يالله عسى غيث الحيا عنه يغنيك
ترعين عشب الخير في كل خبِّه
فهد بن عقيل الطويان - بريدة
لا واحسايف بالقمايم عطايا الله
مرنقه تبحث عن الاكل بالصوره
ليه يا راع المطيه هداك الله
للمرض عرضتها والخطوره
سعود عائش الحربي - جدة
يا الناقه اللي بالزباله تدوسين
موقفك صعب ويبكي العين منظرك
الله يجيب السل.. والغيث غيثين
وتزين حالك وتربع مراتعك
خالد الحربي - الخرج
يا راعي الناقة يا تعبان
الناقة تشرا بالألوفي
ناقتك وده لصمان
عن شين بدرام محذوفي
معيض مليح الغضوري - الرياض
عقب الفياض ومرتفعه بالقفاري
اليوم سجين ومرتعه بالزباله
ماهو على كيفه يسكن إجباري
الله يبدل حالته غير حاله
محمد بن جفران
قعود بالحاويه راسه
والظاهر إنه حداه الجوع
حداه وأصبح كما بساسه
وقلب من ضيعه مفجوع
محمد عبدالعزيز الفراج - الزلفي
دوَّر على العشب بالصمَّان
واترك محل النفاياتي
تلقى النفل والحوذ والغدران
بارض الكرم والبطولاتي
عبدالكريم عبدالرحمن السلوم - القرائن
هذا قبل الربيع وموسم الأمطار
لكن اليوم ترعى العشب تقطف من زماليقه
رياض في خضرها يشرق النوَّار
مرابيه قبل كيل الشعير.. وقبل تدقيقه
عقاب بن سقيان العتيبي - الجمش
البكرة اللي فالبلد مفلوته
تاكل من البرميل وسط الحاره
يا عنك وش هالصوره الممقوته
البل هواها الروض مع مشجاره
دامغ محمد الدامغ
يالجمل جنب وشلك بالنفايات
طبع البساس اتركه لا تجيله
خلك وحيد تشكي الم آهات
حماية البيئة ترى تزيله
مشاري عياض اللميع - عرعر
تنويه
نظراً لضيق المساحة المتاحة ولكثرة المشاركات التي وردت إلى الزاوية ولاتاحة الفرصة لمشاركة الشعراء الجدد فإننا نعتذر هذا الأسبوع من نشر جميع المشاركات.. ونشكر كل من الاخوة الذين لم نتمكن من نشر مشاركاتهم وهم: محمد بن عبدالعزيز الخنيفر، حمد عبدالله الوايلي، خالد بن ناصر المخيمر، سعود بن عبدالعزيز الهزاع، نفل الدوسري، زبن مقبل العنزي، سعد الحماد، صالح عبدالعزيز السويح. على أن تتاح لهم الفرصة في المرات القادمة.
ونرحب بمشاركاتكم الشعرية حتى مساء الاثنين على الفاكس رقم 4871070 أو الإيميل الخاص بصفحة الخزامى:
khozama@alriyadh.com
زاوية: (صوت الصورة) .. ويا هلا