بلاه الليال اللي كثيرٍ بلاويها

زمانٍ وطانا يِخءلي البُوك والمخبات

ليالٍ تقلّب ما عرفنا طواريها

حلالي قضى ما بين كهرب وسيارات

وما بين حاجاتٍ من السوق نقضيها

وما بين سواقٍ وما بين خدّامات

تلفون وأقصادٍ على الحول نوفَيها

وما بين فحصٍ واستمارات سيارات

وما بين دكتور لعللنا يداويها

وما بين غازاتٍ وما بين محروقات

وما بين غسّالٍ للأثواب يكويها

وما بين شرطانٍ وما بين جوّالات

مخاسير هالوقت ما عاد نحصيها

زمانٍ تغيّر يا كثر فيه قولة هات

حريم وبزارين عجزنا نصاليها

يبون المقاضي بالدقايق وبالساعات

وبعض المقاضي ما أعرف وش اساميها

أجيب المقاضي كل يومٍ عشر مرات

وإلى جبتها قالوا بعد وين باقيها

غزونا وغيّرنا التقاليد والعادات

وأنا أحسّبٍ عاداتنا ما نخليها

علينا هالليالي كل يومٍ لها غارات

على أهل اللحا قامت تجدّد مكاويها

أنا ريف قلبي كل ما أذكر زمانٍ فات

أحب السنين الماضيات وطواريها

ليالي السعد عشنا وخذنابها سجّات

عسى الله يعيد أيامها مع لياليها

صديقك يجي لمّك ولو ما يبي حاجات

يوم القهاوي فالمجالس نسويها

تشوف الدلال الصفر فوق الجمر مرَكات

ليالٍ مضت لو تنشري كان نشريها

ومن تاليٍ ما فيه روحه ولا جيّات

تغيّر مسير الأوديه عن مجاريها

أبنذرك يا اللي تأخذ الناس بالحيلات

ترى من حفر لأخيه بيرٍ وقع فيها

تفقّد أذنوبك قبل قولت فلانٍ مات

ترى المنايا كان ماجتك تآتيها

تصدّق من الغالي وحافظ على الأوقات

ودنياك من عقب غلاها تخليها

أنا طالبك يا الله يا غافر الزلات

أنا طالبك نفسي من النار تنجيها

وترحم جميع المسلم الحي والأموات

وتغيث الديار وترحم اللي سكن فيها

وصلوا عدد من حج وأحرم من الميقات

على اللي ركون الدين وضّح معانيها