أسق الحمامة عسى الله يسقي الضامي
من مزنة لين كل الأرض ترويها
على الجزيرة تقافي اعوام واعوام
الرب يأمر بها.. والرب ينشيها
شجعان بن سعود المقاطي - الرياض
طير الهديل اليوم عطشان عطشان
ومكرع يشرب بنفس رضيه
ارفق بحال الطير لا صار ضميان
عطه الطعام الزين صبح وعشيه
عبدالرحمن منصور التركي - البكيرية
اطلق سراحه خلها تلاعب الريح
ما تسمع اللي ناح من نوح ورقا
حمامة ترجع ولا له مراويح
أكله وشربه بالجناحين ترقا
فهد بن عقيل الطويان - بريدة
حمامة الدار صارت عند راعيها
مثل الضنى والضنى له زود حنيه
قدم لها في نظيف الكاس كافيها
عذب زلال يجدد كل عصريه
صالح عبدالعزيز السويح - روضة سدير
الطير يبغى ينطلق لا ترده
مثل الحمام اللي تطاير حواليك
تلزمه يشرب في يمينك تحده
لاهوب مستانس ولاهو مصافيك
علي رشيد الرشيد - رياض الخبراء
حنا هل العطف والرحمة
والكل عارف مواقفنا
حمامتي وأشربي شربه
كود الضما ما يفرقنا
عبدالكريم عبدالرحمن السلوم - القرائن
ياللي مسكت الطير شوري تهده
اللي على طوي المسافة طونه
عزيل من طير على الماء تحده
طيراً حراراً منك ما يشربنه
عبدالعزيز بن قاسم العنقري - الخرج
وش تبي بالطير خله طليق يا صبي
في سما الرحمن هده يحلق يعتلي
فالتوكل قد ضرب به مثل أفضل نبي
يغتدي جايع ويرجع وبطنه ممتلي
ناصر بن جمعان آل عوض - عوادي الدواسر
ذكرتني بالحمام اللي يسليني
يوم كنت في سنك اهواها ولا أخالف
وإذا حمامه غريبه ما تدانيني
سكر مع الما سقيته ثم يتوالف
سعود بن سعد الحافي - الرياض
في كاس معدن مشربك يالحمامه
مدري تبين الكاس والا مغصوبه
مار ا شربي بالعافيه والسلامه
عساك من بد الحمام امحبوبه
عبدالعزيز بن عبدالله البواردي - شقراء
يسقي من الكاس فرخ طاح من عشه
حول من العش وضيع مسكنه وينه
أحسنت في فعلتك ويومه روي طشه
يمارس حياته ويفرد لك جناحينه
سعود بن عبدالعزيز الهزاع - نعام
يا مسقي الضميان يا قرم الاولاد
من علم المنقار يشرب من الكاس
مانيب حاجة دروزت ماك والزاد
يغنيني المنقار عن حاجة الناس
سعد الحماد - روضة سدير
الطير حظه قام يومك قبضته
ومن يفعل الخيرات يلقاه قدام
ولولا الظماء ما كان تقدر مسكته
طيراً حداه القيظ يا ناس ما يلام
خليف الحربي - الرياض
اشرب قبل نقطع رويسك بسكين
وكثر عسى تسمن وتكبر تناديك
يا فرخ انا بشريك لو صرت بالفين
عيني تناظر لك وبطني يناديك
عبدالكريم النغيمشي - الربيعية
راح تغريدك يوم الله رماك
عند الصبي على الماء يجبرك
صفد الجنحان ومن كاسه سقاك
لو كفختي ماله إلا يسبرك
حمد عبدالله الوايلي - حوطة سدير
يا فاعل الخير مجزي بالخير
الطير خله في سبيله ومشكور
مشكور والله لك معزة وتقديره
وتركه به ا لخيرات يا باغي الشور
محمد بن عبدالعزيز الخنيفر - أشيقر
أسق الحمامه دام قلبك رحومي
وأكسب أجر من عند خلاق الأجناس
ماهي غريبه وانت تصلي وتصومي
وش عاد لو أسقيتها ماك بالكاس
خالد بن ناصر المخيمر - روضة سدير
ياللي بتسقي هالحمامه من الكاس
ترى على نيتك ربي يجازيك
فعلتك مظهرها يبا يرفع الرأس
وانا على فعلتك والله احييك
تميم نواف التميمي
اطلق جناحي يا الصغير
الكأس ماهو مشربي
انت تحكم بي ما اطير
الله يفرج كربتي
نواف ابراهيم العمر
التعليق مقفل لإنتهاء الفتره المحدده له
