الجزل يرغب سماعه وانا احب الجزيله
والهزل يذكر ويترك لراعين الهزايل
قاله اللي ما كتبها من الخافق هزيله
ولا نشرها غير للي يحبون الجزايل
من خفوق خليف سلت مثل سل الصقيله
وفوق حدب الضلوع طرسه ضربها من صمايل
من سبب من حطها الله بخافقي نزيله
وخصها قلبي بحبه وشبت به فتايل
طال ليلي من بعدها وهمي شد حيله
وسط جوف كن يقلى على جمر الملايل
ما تقول الا كسير سهير طول ليله
لا الجبر ينفع لساقه ودمعاته همايل
مرت ايام وليالي وانا روحي عليله
كني اللي ما توا اهله وفيه الحال مايل
كن عينه عين حر رقى بأعلى الطويله
شاف جول الصيد قدمه وحدد له حصايل
وكن خده لون برق برق وسط المخيله
وكن عوده عود موز من النسمه تمايل
وكن شعره ليل شتوي وردوفه تشيله
وكن عيني فوق نحره ترى شمس القوايل
وش بوصف من وصايف واعداد بالاصيله
دامها من كل شي خذت زين الخصايل
من سلايل نور عيني وياطيب السليله
بنت عز من قبيله ومن ذخر الشكايل
ياملا ذا حول كامل وغربالي حصيله
لاقدرت الصبر عنها ولا عنها بدايل
ياملا روحي بعدها من الفرقا قتيله
(.....) ذا الحب يذبح ولا يفعل جمايل
حال دون الشوف نفس من العيبه ذليله
وحال دوني سلم اهلها وهو سلم القبايل
ياملا كان ان بعدي على الغاالي جليله
والله ان البعد عنها على صدري جلايل
ووالله ان الحب بلوى ولا بالحب حيله
ووالله ان اللي تشافوا من اعراضه قلايل
خلف بن قعيد الضويحي
ابلاغ
التعليق مقفل لإنتهاء الفتره المحدده له
