اتصل علي صديقي قال بكره نبي نروح للبر ونتعشى هناك أنا والشلة وترى معنا واحد ما تعرفه وش رايك نبيك تخاوينا ودنا نطلع من العصر ونسهر لآخر الليل ونرجع وبدون تفكير قلت.. تم وشتبون آخذ معي.. قال نبي عمرك وبس..
مروا على الشباب وطلعنا للبر وكان المكان ماهو بعيد وجلسنا على النفود وفي مكان يحبه قلبك فرشنا ونزلنا معاميلنا وبعد ما شربنا القهوة والشاي قمنا نزين العشاء.. وفجأة وإلا السيارات حولنا ونزل أكثر من عشرين رجال وقاموا بتفتيشنا مادرينا إلا وطلعوا من الشخص اللي معنا قطعة حشيش وسلمونا لمكافحة المخدرات.. وبعد سجن.. وتحقيق.. وبصمات.. وبعد ليلتين طلعونا وحكم على اللي كان معنا وحنا طلعنا الحمدلله لأن مالنا علاقة.. لكن ليلتين كانت عن عشرين سنة.
هذا كلام واحد اتصل علي.. وطلب مني نشر مثل هذي المشاكل اللي تصير لعدم اختيار الأصدقاء وعدم المعرفة بهم.
وأنا أقول الانسان خصيم نفسه.. واختيار الأصدقاء مهم ولازم نعرف مع من نروح ومع من نمشي.. غير كذا لازم نكون حذرين عشان لايصير لنا مثل هذا الموقف لاقدر الله...
ويالله سترك.
الأب
ابلاغ
التعليق مقفل لإنتهاء الفتره المحدده له
