ألا يانجد .. ياروضٍ رعى به قايد الغزلان
عليك من الحيا وبلٍ .. تهله رايح مزونه
ألا يانجد .. ياريحة خزامى عطرها وجدان
سلامي لك على الساكن يذوب القلب لعيونه
ألا يانجد وين اللي سكن من جملة الخلان
يفز القلب لا صاروا .. جميع الناس يطرونه
ألا يانجد .. بك خلي .. أحبه ما سواه إنسان
على المسحوب غنا له .. خفوقي ساجع لحونه
ألا ياغيمةٍ هلت على داره .. مطر هتان
عليك الله للغالي سلامي .. لا يردونه
صوابك مابرا مني .. بقي يالقاتل الفتان
قتلني رمشك الساحر .. بعد ماصوب طعونه
عذابي غرةٍ طاحت تغطي طرفه الخجلان
وخدٍ .. كنه مراية أشوف به القمر لونه
ألا يانجد .. ياليلٍ سرى في ناظري طربان
عليه القاف والمعنى قصيدي يكتب فنونه