اللي يبا العليا يروم الطويله

عبدالله المرشدي

    الشعر ولع في خفوقي فتيله

باقصى معاليق الحشا تشعل اشعال

ان ما كسبت الشارده والجزيله

مالي مع أهل العرف مخرج ومدخال

الهرج واجد والفوايد قليله

وقت الصمايل تختلف بعض الاقوال

قول بليا فعل وش ترتجي له

ضرب من التظليل وازعاج واجدال

احد يحصل من كلامه فشيله

واحد تشيله كلمته فوق ما طال

اللي يبي درب الخفا والرذيله

يطلق عنان النفس ويعاشر انذال

على طريق الغي يلقي زميله

والكل منهم لا سود الفعل يحتال

واللي يبا العليا يروم الطويله

يسعى لها ويثبت اقوال بفعال

يمشي على درب الشرف والفضيله

ما ينحني لو فيه كف الدهر مال

يسعى لكسب الغانمه والجميله

ويحط له في ماكر العز منزال

اللي يبي قطف الزهر ينحني له

ما تكفي النيه لتحقيق الآمال

نيل المنى لا بد له من وسيله

بالصبر والمجهود يتغير الحال

من غاص في غب البحور المهيله

لا بد يصبر لين ياقف على الجال

لا صرت في غربه يبي لك دليله

بس البلا لا صار في مخك هبال

ما يقنعك شرح العميل لعميله

يبلش بك اللي مقصده ينصح الضال

الحر في دربه يخاوي مثيله

والبوم ما له بالمراقيب مدهال

ممشى الهبيل بجنب ناس هبيله

لو يعرفون الدرب ما فيهم الدال

العاقل ان ما جاك حاول تجي له

احذر تماشي في مماشيك جهال

ترى الخوي لازم خويه يشيله

واحد من الاثنين لا بد ينشال

النفس تهوى كل برق تخيله

لاهملتها ترميك في وسط الاهوال

احذر تطاوعها بما تشتهي له

اضغط عليها لين ترضى بالاحوال

ترى القناعه للنفوس العليله

تحصين حتى عن مرض جمع الاموال

اد الصلاه الواجبه والنفيله

صوم وتزك وحج ياطيب الفال

احرص على الارحام واللي تعيله

وامك وابوك اجزل لهم كل مكيال

والجار له حق حرام تزيله

وفه حقوقه واعذره كل ما عال

البخل وسم بالوجيه البخيله

يبين لاجا صاحبه يدفع ريال

الطيب ميزه والفعول تهدي له

ما كل من يلبس من الشمغ رجال

والبيض يكفي من هواهن حليله

تحفظك في غيبتك وتربي اجيال

بين النساء بالشكل تلقى بديله

فرق بسيط وجوهر الشكل لازال

الفرق يظهر بالصفات النبيله

بالعقل والاخلاق ما هو بالازوال

احرص على بنت الرجال الاصيله

السالمه من هرجة القيل والقال

اسئل عن المنزال قبل تعني له

ما كل شجره ينوجد تحتها ظلال

ما كل وادي لو تسايل مسيله

تطلع بوادر بذرته عقب ماسال

وقت الرخا يطلع لك الفين حيله

تلقى الخوي والجار والعم والخال

ووقت الشدايد تنصدم بالحصيله

يطلع لك النصاب والنذل والذال

تلقى خوي شهم يسوى قبيله

والا الدويني منظره بس تمثال

قاف دعاني ما بغيت ارتكي له

فجر بجوفي من عنى الوقت زلزال

حاولت ابين زبدته وتحليله

في نص ساعه سقته اقفاي واقبال

قلته وقلبي فوق صلو المليله

وارتاح بالي يوم روضت الامثال

وصلاة ربي عد وبل المخيله

على الصدوق الصادق بكل ما قال