الاسبوع الماضي كان لغز الاسبوع من طرح الشاعر عبدالرحمن صالح الفرهود من الزلفي والذي يقول:
على أهل العرف ما يصعب يجي للمعضلة حلال
وانا لغزي صعيب بحال وإلا حال يا هونه
عن الاخوين ابا أنشدكم تراهم طيبين افعال
الاول تلقحه بنت وهو راضي على شونه
والآخر لوه ابعيد يجيب بنية في الحال
تجي مثل اختها لو الشبه متخالف لونه
وقد توصل للحل شعراً:
هلا بلغزك يابن فرهود هلا بصفحة شعر وارجال
جوابي عن طريق اخوان تبيهم هاك مضمونه
هو الفكس ونقل حلي رسالة تشبه الجوال
تطور فكس بالحاسب بليا اوراق يعطونه
فهد بن عقيل الطويان - بريدة
أحد يرسل على الثابت وأحد يرسل على الجوال
وانا برمع بمرماعي حسب وصف يقولونه
هذاك الفكس يرسل صورة للفكس يا رجال
ولو تفرق هذيك البنت اشوف الناس يقرونه
سالم حبيب البشري - الجبيل
سلام الله عليكم يا هل الزلفي سلام اجلال
وصح الله لسان اللي يحبك اللغز ولحونه
انا برمع على فكس يبي يوصل المرسال
وبه مرسل ومرسله عسى لا بان يقرونه
زامل سالم البشري - الجبيل
انا لغزك عرفته يا المحنك يا وسيع البال
رخيص الحاجته يومن كثير الناس يشرونه
تراه الفكس وبنته الرسالة يوم جاء المجال
الاول تلقحه وتلدبها الثاني بمضمونه
عبدالعزيز بن عبدالرحمن القشعي - الزلفي
سلام الله على من جاب لغز واضح الامثال
تحية يا هل الزلفي لأهل الجود مضمونه
نشارك مع ربوع اللغز حله والعلوم اجزال
هذاك (الفاكس) نرسل له ويستقبل على هونه
علي رشيد الرشيد - رياض الخبراء
هلا يا مرحبا ترحيبة تنشال بالموال
تحية وافية عطرة على الطاروق موزونه
ابرسل حلي بأسرع جهاز يرسل المرسال
تراه الفاكس وبه صورة تجي عندك وتقرونه
صلاح بن عبدالله اليابس - رحيمة
ألا يا مرحبا لغزك ثمين وينشرى بالمال
ارسلت حله عبر الفاكس واريد الناس يقرونه
انا رمعت حله فاكس وانت تعرف الخيال
والا خزامى الها ربع يكتبون وينشرونه-!
تركي بن حمد العضيب - البدائع
حله فاكس يا سنافي وضبط عندك الفنجال
نبي نشوفك يا سنافي كيف الحال وشلونه
وحط رسالتي بالفاكس واعطي شارة الارسال
عسى فاكس الخزامى يستلم لا جوه يلقونه
خالد بن عبدالرحمن الصالح العريني - البدائع
كما توصل للحل نثراً:
خلف بن عايد السحوم - بريدة، سعود عائش التميمي الحربي - القاهرة، محمد عبدالرحمن ابو دحيم - البدائع.
لغز الاسبوع
كتبه الشاعر سعدون مرزوق الشمري من الجبيل ويقول:
انشدك عن اخوين وعيال رجال
متقابلين وكل واحد لحاله
اخوين لكن فرقهم طيب الافعال
والا مواقفهم مواقف جماله
الاول اللي ماكره راس ما طال
والثاني اللي ما جهلنا وصاله
نستقبل الحلول على الفاكس
4871070او الايميل ashammari@alriyadh.com