يا ناس مالي في الغزل ودروبه
اعلنت من هذا المكان التوبه
لو يعترض عنق المها قدامي
والله ما عاد ألد عيني صوبه
ولا عاد يجذبني بحلو اخلاقه
وبهرجته وبضحكته واسلوبه
اخشى من المنقود ومن الزله
ومن غلطة تبقى علي محسوبه
جنبت عن درب الهوى بالمره
والعين من يم البني محجوبه
خليت درب الحب ومعاناته
اللي يا دوبه بالمحبة دوبه
الليل كله مشغل جواله
ويقول ادور لي على محبوبه
والعصر في سوق النساء متمركز
يعدل أشماغه وكاون ثوبه
ما هوب مثلي غارقا بهمومي
كني على ما قيل في غيبوبه
يوم اتمعن في الزمن وصدوفه
وأيامه اللي بالغثاء مصحوبه
أقول يا نفسي واخاطب نفسي
دنيا الشقاء نياتها مقلوبه
تدرج رحاها بين يوم وليله
وفيها الصاحين العقول اعجوبه
مار الفطين اللي يلد لربه
ويطلب من المولى يغفر اذنوبه
وختامها يا الله لا تخذلنا
وافتح لنا باب الفرج والتوبه
محمد عوض بجيد العتيبي
الجبيل