الاسبوع الماضي كان بيت الاسبوع من طرح الشاعر محمد الخنيفر والذي يتناول قضية التفحيط وكان البيت:
عادة التفحيط طالت ولا شفنا حلول
ياولي امره تحرك مع رجال المرور
وكان صدى البيت من الشعراء كما عهدنا ونعتذر عمن لم نستطع نشر صداه لضيق المساحة.
داري ان الله لعن من يضيع من يعول
لا تهاون بالامانة ثم تبلى بالشرور
الولد لا تتركه لكل داشر ومهبول
ان سلم ما انقلب حط بالسجن مخفور
سعود بن عبدالعزيز الهزاع - نعام
افزعوا يهل المروه رزينين العقول
آفة التفحيط بلوى وعلة فالنحور
ارشد اللي مبتلي وانصحه حسب الوصول
والنصيحه كم جلت من صعيبات الامور
نايف بن سمار الشلاحي
الولد لو شفت فعله تبرر وش تقول
جاهل نفسه يضره ترى زود الحضور
خوفتك امه وعذرك على دايم زعول
والملامه تبتديبك وهي فيها قصور
فهد بن عقيل الطويان - بريدة
البدايه للنهايه تبتدي بأول دخول
ساحة التفحيط والسابق صغير به غرور
والشباب اللي يشجع صابه الوضع بذهول
يحسبون ان النهايه كلها فرح وسرور
صالح احمد اليامي - الدرعية
يمكن ان الظاهره يوم بجهود تزول
ننقذ الشبان والناس من بعض الشرور
مهلكه للمال والنفس مشكلها تهول
كم اسر عانت من الحزن من عقب السرور
مشاري خالد الدعجاني - شقراء
يا محمد كان تنشد وتسمع ويش اقول
المفحط له كم اسلوب ويلف ويدور
دام ولي امره من امه الى ضاقت خجول
مالنا الا الصبر والله يكافينا الشرور
محمد جلمود الشكرة - الدلم
كم قرينا فالجرايد وكم سمعنا من يقول
عادة التفحيط صارت مشكلة فيها ندور
والثمن ارواح تزهق الرقم فيها يهول
والخساير فالمواتر والحصيلة في سطور
محمد سليمان الكثيري - المزاحمية
اشهد انه يا جماعه مشكله صعب تزول
عادة التفحيط كثرت وفيه اصبح تصور
كم سمعنا بالتفاحيط قولاً بعد قول
الخطر منه كثير كثر موج البحور
محمد المسعري
المفحط قام في الشارع يصول ويجول
يقبل ويقفي ويجهل صعيبات الامور
والله انه صابني من مشاهدهم ذهول
خص لا شفته مع الشارع يلف ويدور
ابراهيم بن مسمار القحطاني - الرياض
ياولي الامر لا تعتذر لا لاتقول
اولدي ورع وجاهل وغيره ما العذور
امسك اولادك وراقب على كل الميول
والتعاون واجب منك ورجال المرور
مبارك محمد بن طرجم الضعاوين - وادي الدواسر
اسحب الموتر منه لا تصير انت مهبول
تحسب انك نافعه وانت دافه للقبور
خذ نصيحه والنصيحه تقبلها العقول
السليمه ما تعرف التكبر والغرور
بدر بن خلف الحزيمي
بيت الاسبوع
مع شكرنا لكل شاعر بعث لنا ببيت الاسبوع نختار للقراء الاعزاء والشعراء هذا البيت للشاعر: صالح احمد اليامي من الدرعية ويقول:
الشعر ماهوب سلعه كله احساس وشعور
للاسف اصبح رخيص في محطات الفضا
والذي يناقش كثرة القنوات الفضائية الخاصة بالشعر مما سببت انحداراٍ للشعر الشعبي بقصد الهدف المادي.
نستقبل صدى البيت بثلاثة ابيات فقط تدور حول موضوع البيت على الفاكس 4871070خزامى الصحارى - زاوية بيت وصدى.
او الايميل ashammari@alriyadh.com
اقتراح موضوع بيت الاسبوع القادم
بعث لنا الاخ سعود الهزاع هذا الموضوع لبيت الاسبوع القادم وهو قضية التعصب لتشجيع الاندية والازعاج عند الفوز.
1
سلم لسان الشاعر وسلم بنانه ولكل مجتهد نصيب
الأستاذ عادي حبذا التدقيق ولك التقدير من أخ محب
أبوعمر التميمي - زائر
01:55 مساءً 2007/06/07