فيك الحلا والدلع فيك الغنج كله

يا مصدر الشعر يا سبة معاناتي

فيك الدوا والهواء يا سبة العله

يا مهجة الروح يا ست البنياتي

الجرح من سبتك لو زاد ما مله

داوي جروحك وهاتي غيرها هاتي

يا قبلة البيض يا قسى من جرح خله

يا نشوة بالخفوق تفجر آهاتي

يا كامله بالبها يا روده وفله

يا نور عيني على كل اتجاهاتي

لو شفت غيرك من الزينات ما فطن له

ما شوف غيرك ولو عرض لنظراتي

أغليك واهواك أنا يا باهي الطله

أهواك في سكنتي والاحراكاتي

القلب مفتوح بابه طيفك يدله

ما يدهله غير طيفك أنت بالذاتي

جيش الغلا في خفوقي صار محتله

في ثومة القلب حبك رز راياتي

طيفك رتع بالخفوق وصار مدهله

لو غاب عني صباحي بالمسا ياتي

صوتك يصب الغلا بالقلب ويزله

مع جاري الدم يجري مع كرياتي

من شان حبك جميل الصبر باذله

حتى ولو فاتني باقول ما فاتي

ان كان حبي بقلبك باني فله

عندي غرامك مبني له عمراتي

الشوق سكانها والشعر عبدله

يا مر ولا مره يجيه الرد بابياتي

الشعر وصفك من الأعماق يستله

ويبين حسنك لمن يقرا كتاباتي

لا تحرق القلب بالاشواق وتذله

راجع حسابك قبل لاسحب ملفاتي

تراي شهم كريم وادمح الزله

واخاف من خالقي رب السمواتي

صادق بقولي ولي مذهب ولي مله

ما خاف غير الولي رب ا لبرياتي

ماني من اللي يجي في هرجته خله

اعدل المايله واقدم ولا احاتي

ما قول بنساك لا والله لا والله

لكن تبيح كنيني عقب مسكاتي

تمنيت قاف عساه لريقك يبله

عساه ينبيك عن خافي معاناتي