بين الهوى والنفس

    لاهاض جاشي واشتعل فيه لا هوب

قامت هواجيسي توارد عليه

منها جفن عيني عن النوم مقضوب

وباقصى خفوقي كية فوق كيه

جرح عطيب وخافقي منه معطوب

وحلم كبير يمر صبح وعشيه

صورتها من واقع شبه مقلوب

ومفهوم يتغير على كل نيه

ليل بهيم وصبح وشروق وغروب

وأربع فصول وكورة دايريه

برد ودفا وافراح واتراح وحروب

بين الضديد وبين ضده لضيه

مشاكل ما بين سالب ومسلوب

لا بد تطحن في رحاها ضحيه

كرّه وفرّه بين غالب ومغلوب

كل على ما راد يرمي رميه

آهات مع حسرات والدمع مسكوب

بأسباب جرح وعلة داخليه

وساعة صفا فيها الوفا ماله أسلوب

ولا للامان بدايرتها قضيه

نجمات تتراقص على لحن مسحوب

وغصن تهزع مع لحن سامريه

زرع يموت وباذره توه حبوب

وورد ذبل محتاج رد العطيه

لذه ورى لذه يجي وقت وتذوب

في غبة الاحزان تنسى الهنيه

نسيان في نسيان واوزار وذنوب

بأسباب نفس في هواها شقيه

بين الهوى والنفس وأشواق محبوب

دارت مدارات العلوم الخفيه

مطامع ولذات شهوات وقلوب

ولا كثرو الرعيان تفنى الرعيه

تفكير في تعمير طوب ورى طوب

أخذ وعطا وأحلام نفس رضيه

تخالف الهقوات في كل مضروب

وتقطع مسافه والنوايا مطيه

موج الظروف أشكال والموج سالوب

يسلب مفاهيم العقول الذكيه

تسابق الأقدار والغيب محجوب

وكف الليالي بالحوادث نديه

أحداث مرت في حضارات وشعوب

والمقبله ليلاتها سر مديه

لحظة تمر وتالي الوقت مطلوب

تستوفي وتوفي حساني وسيه

رحله عمر تلقى لها درب ودروب

في سكة بين المنى والمنيه

مفهوم يبقى كل مافات محسوب

واللي يجي في علم رب البريه

واجب تطيع الشور يا لعبد وتتوب

ما دام باقي بالليالي بقيه

تب للذي شانه من الخلق مهيوب

عساه يغفر ما مضى من خطيه

قلته وأنا ماني على القول مغصوب

آخذ من الجزله وأكب الرديه

وختام آخر بيت بالمسك مكتوب

صلوا على المختار مليون ميه

عبدالله مرزوق المرشدي