هلا بك والجفا .. سيفٍ لمع شكل الكلام جروح
هلا ما أمطر سلام وفاحت دلال السوالف هيل
هلا .. لو ما حكى صمتك وثار من الجوارح بوح
غلا يا أنتي.. وأنا أدري بك شموخ المرحلة والليل
قريتك يالرذاذ اللي .. رسم بك للطفولة روح
أهيجن .. والشعر صوتٍ نثرته.. والمدامع سيل
شربتك والضما .. يروي شفاه المرحلة والنوح
ألم الليل وأتحرى .. متى صمت الكلام يميل
ترفق بالشموخ اللي .. أحبه لو جفاه يفوح
جمعتك ليلي البارح وضميت الملامح حيل
أشق الصمت .. وأسري بك وأساهر طيفك المملوح
أغني فيك وجداني.. معي.. وأيا القمر وسهيل
كبرنا والزمن موحش.. وصحنا صوتنا مبحوح
بكينا والندم.. ينزف تعاسة حظنا والويل