الرئيسية > خزامى الصحارى
بيت وصدى
الاسبوع الماضي كان بيت الاسبوع من طرح الشاعر: فهد الطويان والذي يتكلم عن الواسطة ومالها من تأثير على المجتمع وتقديم غير الكفء على المؤهل والبيت يقول:
الواسطة ظلم وتعدي على الغير
إذا انوخذ به حق مسلم لغيره
ولم نستطع ولن تستطيع حقيقة ارضاء الجميع في نشر الاصداء نظراً لكثرتها وان دل على شيء فإنما يدل على نجاح هذه الزاوية التي تحكي هموم المجتمع وايصال صوت المواطن للمسؤول.
ومن الاصداء الجميلة للبيت المطروح:
دايم ونسمع رح لابو فلان لا غير
وتسهل امورك والطويلة قصيره
على حساب اللي تعب بالمشاوير
ودعواه لو كانت صغيره كبيره
محمد عفار المطيري - عنيزة
الواسطة في بعض الاحيان من خير
فزعه وجميله للرجال البصيره
واحيان مثل الطين لي حاس بالبير
يعمي عيون الجم لو هي غزيره
حسين محمد القفيلي
ولاصار يظلم ناس من دون تبرير
فاضعيف راي ودين خاين ظميره
ما خاف من ربه ولي المقادير
اللي يعرف البينه والسريره
حمود بن فهد آل جنبان الدوسري - وادي الدواسر
خوفو من الله يا الوجيه المسافير
لا تبخسون الناس حبة شعيرة
الظلم يرمي صاحبه في زمهرير
ويرميه في نار توقد سعيره
بدر بن خلف الحزيمي
الواسطه في نية الخير تنوير
في كل صعبات الظروف العسيره
حلال ما تحتاج نشده وتفسير
في شرط ما نفرق عشير وعشيره
جلعود لافي الهمزاني - حائل
ذي عجز فيها يالسنافي مناعير
حتى الموظف عجز منه مديره
لكن بالدنيا بعد باقين خير
يوجد بها اللي ما يخونه ضميره
غنام مسعود القريني
يا ظالم الانسان في ديرة الخير
احذر عقاب الله رب السريره
ترى الظلايم سيف باتر وتعزير
حاسب ضميرك قبل يوم الحشيره
علي جابر الزولاني الفيفي - فيفا
يا ظالمين الناس ما شفتوا الخير
افعالكم هذي تراها خطيره
صرتوا مع المقبول من دون تعكير
واللي خذ الممتاز وشهوا مصيره
محمد بن عبدالعزيز الخنيفر - اشيقر
لو الدعاوي كبر ابانات والنير
بالواسطه تصير قدمك صغيره
تكفون يا هل الجود والطيب والخير
الظاهرة هذي تراها خطيره
ابراهيم بن مسمار القحطاني - الرياض
لا بأس كان الواسطه جت على خير
يفرح بها المسلم وبالامر خيره
وان كان فيها ظلم عرقلبها السير
ومن يظلم الاجواد ضيع مسيره
معتاد عويش السلمي - الرياض
اكبر مرض في المجتمع يا مناعير
منها رجال العرف في كل حيره
يكفي كذا يا ناس قطع الطوابير
والواقف المسكين وشهو مصيره
جسار مهدي السبيعي
للواسطة على اكثر الناس تأثير
تاخذ حقوقه غصب ما تستشيره
اخذ حقوق الناس من دون تبرير
تحير العاقل وتجرح ضميره
سلطان بن حمد الحبابي - الطائف
الواسطه مطب في خطة السير
عوق النظام وعقبه في مسيره
تسلب حقوق الطيبين المناعير
وتروح لاصحاب اليمان القصيره
عدنان مرضي - الزلفي
بيت الاسبوع
بعد شكرنا الجزيل للشعراء الذين بعثوا ببيت الاسبوع وصياغة لفكرة بيت الاسبوع وهم كل من: ماجد مرزوق الهذلي - عفيف، بدر خلف الحزيمي، علي جابر الزولاني - فيفا، حمد عبدالله الوايلي - حوطة سدير، وقد اخترنا البيت المطروح من الشاعر: سلطان بن حمد ابو شقاف الحبابي من الطائف ويقول حول موضوع ضرورة التأمين الصحي من قبل الدولة للموظف الحكومي.
ويقول:
كان تأميننا الصحي من الله مباح
قلت فكرة رهيبه عاش من جابها
نستقبل صدى البيت بثلاثة ابيات فقط تدور حول الموضوع المطروح على الفاكس 4871070خزامى الصحارى- زاوية بيت وصدى.
كما نرحب بطرح بيت الاسبوع او فكرة على ان تناقش قضية اجتماعية هادفة.
فكرة مقترحة لطرح بيت الاسبوع القادم بمناسبة المهرجان الوطني للتراث والثقافة والذي سيرعاه بإذن الله خادم الحرمين الشريفين يوم الاربعاء الموافق 26محرم 1428ه فيسرنا ان يكون بيت الاسبوع حول هذه التظاهرة الثقافية الكبرى.