الطيب والخوه وجزلات الأفعال
عسرات للي يبتغون العلالي
ما كل منزل للرجاجيل مداهال
ولكل مدهل فيه تلقى رجالي
ولا كل من تنخاه للحمل شيال
ولا كل فزاع فزع لك ياغالي
أفعالنا وطباعنا وبعض الأقوال
تغيرت وما عاد فينا وصالي
قام الردى يندس فينا ويختال
بان الردى والبعض فيه اختلالي
خذها نصيحه والزمن فيك لوطال
يجيك يوم ويذكرونك أجيالي
خذها نصيحه يمكن بيوم تنقال
نصيحة العقال يوم المقالي
خذها من مجرب وصل عالي الجال
ويوم ارتفع حدر من أعلى الأعالي
خويك المخلص على كل الأحوال
لاتامنه واحذر مطاح الحبالي
اللي رفيقه يرفع الراس ما مال
ينهى رفيقه عند دروب الخمالي
واللي رفيقه خايب خاب وان طال
حبل الرفاقه بينهم باحتمالي
تلقى من الأشخاص طيب ومازال
متمسك بعاداتهم بارتجالي
متمسك بعادات ويضرب لها أمثال
عادات كانت في زمان مضى لي
عادات كان الناس حلوين وقلال
تجمعهم البسمه لو الجيب خالي
واليوم انت الشيخ من بعد الأموال
وانت السفيه إن قل مالك وزالي
لاتغرك الدنيا تراك انت رحال
ولاتغرك الفتنه وبعض الدلالي
وابسط يمينك يم خير ورجال
وامسك يمينك عن ردي العيالي
خذها نصيحة من حداه الزمن قال
ياما نصحني وقلت ماله ومالي
عبدالله بن صبيح الشراري