الرئيسية > خزامى الصحارى
بعض المحبة
لا تتصل ما عاد لي فالهوى ذوق
أعطيك جوالي هدية وفارق
بعض المحبة ما لنا وسطها سوق
وحب على غير الشرف به فوارق
خلاص مالي شوق يا مرتع الشوق
دوّر وتلقى شخص مارد ومارق
أنا بدوي شوقه الروض والنوق
والخايع اللي من زبا السيل غارق
في حاجره تنبت خزامى ورقروق
يعلها مزن لها نوض بارق
لا خيّلت هجماتها رعود وبروق
وإليا أمطرت نزواتها غيث فارق
فوحة نداها ينعش القلب ويتوق
يسرق هموم القلب تقول سارق
أسج فيها واشبح بناظري فوق
أطرب نظر عيني بزين المشارق
كن الوطا يسحب لي العشب برفوق
ويمدها حزمة ورود وزمارق
ماكني ألا قبل ساعات مخلوق
صحوة عمر لور رمح الأقدار زارق
ما شلت في قلبي من الهم معلوق
يوم إن هم القلب للقلب حارق
مبعد عن أهل الحسد والحقد والعوق
ما حاشني من قول الانذال طارق
اللي تحط الطاق بالطاق مطبوق
وتكسر على ركاب الهروج المطارق
1
قصيدة جزلة ورائعه اخوي غزااي
صحت اليدين اللي كتبت ولا هنت يالغاالي
دمت بود
عنود - زائر
05:41 مساءً 2006/02/12