رد الثنا بالشكر ماهوب تطنيش

كلمة وفا لا قلتها تبرد الجاش

ما قلت بدي شين والا ما بديش

كلمه بدت من خاطري قلتها كاش

يا صاحبي لا صار بالفكر تشويش

يحس من كيفه ويضرب على ماش

ماكل قول تسمعه تفتهم ويش

من هرجة الشعار تنصاب برباش

محدٍ بسامع لك ليا قلته له ليش

ولانته بفاهم لين تتعب وتنداش

اقر السطور وخل عنك الخرابيش

ناظر بعينك زين لا ترمش رماش

لا تحرك الاشجان يا ناعم الريش

ريح ضميرك من متاهات ونقاش

ماني بيمك يا عشيق المرابيش

اشوم بعيوني وفكري ليا طاش

اقلط على الواجب واكب العراميش

ولا صدت صيد اترك على دربي عراش

نفسي لها عن ماكر العز تنبيش

وعيني سما لو كنت جالس على فراش

طبعي وفا مافيه كذب وتغشيش

قرم شجيع وقلبي ابيض من الشاش

يشدني برق المزون المراهيش

اطرب ليا من شفت جاي له.. رعاش

ماتهت مع راع الكفوف المناقيش

حب البني ما حط في قلبي عشاش

الا التي ما عرضت للطواريش

ريم هواها صار في مهجتي داش

بدر ملكته في طرف نوره اعيش

وانسى النجوم اللي لها لمعة فلاش

ما ودي اذكر حسنها الحين واطيش

ادري بقيفاني على وصفها عطاش

ماني مهمش مطلع القاف تهميش

اخاف مما قلت يجيك هشاش

القصد واضح ما خدش القيل تخديش

قول سليم ولا بدا فيه وشواش

اترك زمان اللعب والحب والطيش

لا تصير خبل من ورا الناس تعتاش

مافيه باللفات نقطة وتفتيش

دربك خضر ليتك مع اللدرب تنحاش