• انت الآن تتصفح عدد نشر قبل 861 أيام

ما قلت بدي شين ولا ما بديش

عبدالله مرزوق المرشدي

    رد الثنا بالشكر ماهوب تطنيش

كلمة وفا لا قلتها تبرد الجاش

ما قلت بدي شين والا ما بديش

كلمه بدت من خاطري قلتها كاش

يا صاحبي لا صار بالفكر تشويش

يحس من كيفه ويضرب على ماش

ماكل قول تسمعه تفتهم ويش

من هرجة الشعار تنصاب برباش

محدٍ بسامع لك ليا قلته له ليش

ولانته بفاهم لين تتعب وتنداش

اقر السطور وخل عنك الخرابيش

ناظر بعينك زين لا ترمش رماش

لا تحرك الاشجان يا ناعم الريش

ريح ضميرك من متاهات ونقاش

ماني بيمك يا عشيق المرابيش

اشوم بعيوني وفكري ليا طاش

اقلط على الواجب واكب العراميش

ولا صدت صيد اترك على دربي عراش

نفسي لها عن ماكر العز تنبيش

وعيني سما لو كنت جالس على فراش

طبعي وفا مافيه كذب وتغشيش

قرم شجيع وقلبي ابيض من الشاش

يشدني برق المزون المراهيش

اطرب ليا من شفت جاي له.. رعاش

ماتهت مع راع الكفوف المناقيش

حب البني ما حط في قلبي عشاش

الا التي ما عرضت للطواريش

ريم هواها صار في مهجتي داش

بدر ملكته في طرف نوره اعيش

وانسى النجوم اللي لها لمعة فلاش

ما ودي اذكر حسنها الحين واطيش

ادري بقيفاني على وصفها عطاش

ماني مهمش مطلع القاف تهميش

اخاف مما قلت يجيك هشاش

القصد واضح ما خدش القيل تخديش

قول سليم ولا بدا فيه وشواش

اترك زمان اللعب والحب والطيش

لا تصير خبل من ورا الناس تعتاش

مافيه باللفات نقطة وتفتيش

دربك خضر ليتك مع اللدرب تنحاش



عدد التعليقات : 4
  • 1

    عبدالله مرزوق المرشدي
    صح لسانك مدد بلا عدد

    طــــــــــلال (زائر)

    03:34 مساءً 2007/02/25

    ابلغ عن هذه المشاركة

  • 2

    الشاعر الجزل بيض الله وجهك
    هذا القصيد او بلاش
    صح السانك
    ياعبد الله ابن مرزوق
    وننتظر جديدك

    شبيب العتيبي (زائر)

    03:59 مساءً 2007/02/25

    ابلغ عن هذه المشاركة

  • 3

    قصيده رااائعه وجزله
    صح لسانك اخوي عبدالله
    وياليت الجريده تتحفنا بالمزيد من روائع هذا الشعر الرائع والمميز.،
    ابونواف

    سعد بن عبدالعزيز (زائر)

    08:58 مساءً 2007/02/25

    ابلغ عن هذه المشاركة

  • 4

    الشاعر الجزل المبدع
    صح الله لسااانك.,
    يا عبدالله المرشدي
    اسم ارتبط بالابداع والتميز
    دمت.. و دام تميزك
    .. اخوك..
    عبدالله بن أحمد

    عبدالله بن احمد (زائر)

    01:07 صباحاً 2007/02/26

    ابلغ عن هذه المشاركة




التعليق مقفل لانتهاء الفترة المحددة له

إعلانات