الغزال اللي بقرنه يمسكونه
وش حدا المقرود ينزل للسهالي
ليه ما عدا بضلعٍ ما يجونه
ليش ينزل من عسيرات الجبالي
ساكر عبيد الرشيدي
عن يسار الجيب رجال انتحاري
مد إيده ثم مسك قرن الغزال
كان يجري مع صحاصيح الصحاري
وأتوقع كان في صحراء الشمال
جلعود الهمزاني - حائل
لا من قضا منك الفشق وأنت بالصيد
ثم شفت لك ظبي على الريع يختال
أكيد تطرد صيدتك وبين ما تريد
ثم حدّها واللي على الباب يشتال
سعود بن سعد الحافي - الرياض
أقول خل الريم مالك وماله
وأفطن لنفسك لا تقع من على الجيب
اللي فعلته صار فعل الجهاله
الصيد له عرف.. وطريقه وأساليب
زياد بن عكروش الضويلي - حائل
خويكم يا سايق الجيب مخطور
سرعة خلا فيها الخطر وامعروفه
وريم الفلا خلوه يجفل ومذعور
ظبي الخلا يغني عن الطرد شوفه
فهد بن عقيل الطويان - بريدة
الله على وقت مضى لظبي فات
مدها له بوقتٍ مضى راس الحبل
واليوم اشوفه بعد روس الطايلات
عاف الطويل الشاهق وحب السهل
سلطان بن حمد ابو شقاف الحبابي - الطائف
هاذي دعاية صيد ولا حقيقه
ولا تطور في طريقة هل الصيد
يازينها يا حلوها من طريقه
مافيه داعي للفشق والبواريد
محمد عفار المطيري - عنيزة
الظبي خلوه يا أصحاب الجيوبي
من جزير ثناء وراكم تقرضونه
بعد ما كان الظبي ملي الخبوبي
في بلدنا اليوم نادر تاجدونه
عائض عبيد قعيشيش المقاطي
- الدوادمي
خل الغزال ولا تعرض سبيله
وقت الربيع وليتكم تتركونه
خله يروح ويهتني مع مثيله
ترى التكاثر مطلب تعرفونه
محمد بن عبدالعزيز الخنيفر - اشيقر
لا تصدم اللي ينضرب وصفها الزين
أجمل براري ما بقى من طبيعه
يطرد غزال البر جيوب وصوالين
الريم جور الصيد أفنى قطيعه
سعود بن عبدالعز يز الهزاع - نعام
ياليتني يا الصقر وياك وانخاك
هد الدريك وطاح بمخلب دريكه
صيد المها ياخوي نأمله وأرجاك
وأرف بحالك صار موتك وشيكه
نايف عايد الشمري - الرياض
الجيب يطرد له غزال يباريه
من سرعته كتم عجاجه خلافه
والراكب اللي أرخص العمر لغاليه
قمة تهور بالخطر والكلافه
حمد بن عبدالله الوايلي - حوطة سدير
يا طويل العمر يا والله البليه
لوه غيره ما يسوي ذا السويا
اقنصو به ما على منهو خويه
واحذروه ايجي صيد فالعليا
غنام مسعود القريني - نعام
الهواية خطيرة والضحية غزال
وهوايتك لا تعود تروح معها ضحية
ليتها عندنا كان الحماية جزال
تحمي العارض وتحمي جبال العليه
محمد عبدالله المجلي - حوطة بني تميم
للبر عشاقه وللصيد هاوين
والظبي في صحرا الظما ضاق حاله
وصورة المشهد على موتر الفين
ما ظني انه طارد الصيد ناله
جابر أبوهيبة الودعاني - جازان
خاطرت أنا نفسي لاجل ضبي غالي
جينا نبيه ووفق الله وصدناه
ولاشك طرد الصيد بأول وتالي
رغم التعب متعه وواجد مزاياه
صالح بن عبدالله الزرير التميمي - الرس
الغلطة اللي ما لها اليوم مثمون
يروح عمرك من سبايب فعلها
لو طحت يالمجمول أصبحت مدفون
راحت حياتك والسبايب جهلها
خالد بن ناصر المخيمر
- روضة سدير
شفت الغزال اللي رماها ابو ريان
كريم اللي صادها بالصحاري
لو اهني من صادها ياكحيلان
حظي كبير إن شفتها بالبراري
حميد بن خلف الملفي العنزي
- الرياض
انتبه يا سواق للراكب يطيح
مفادي بعمره من شان الغزالي
ما يسمع الصوت لو إني أصيح
بيني وبينه مسافات وجبالي
دامغ محمد الدامغ
- روضة سدير
راع القنص دايم على القنص ولهان
هذا خطايا خوانا اللي نشوفه
شفنا كريم يصوّر الجيب عجلان
وظبي صغير وطيبات وصوفه
بدر بن حمدان بن رازن - الثمالة
الصوره إليا افترضناها حقيقة
ولا هي بمنتاجٍ ولا هي بتركيب
اللجيب لحق الريم بالجرهديه
واللي قضب قرنه خطيراً من الجيب
سعود عائش التميمي الحربي
ذكرتني في زمان الصيد
من شفت أنا الظبي بالصوره
وراه جيباً يجوب البيد
أربع وعشرين ما طوره
محمد مفرح مريبد العنزي
- القريات
ما يستوي لك مسكة الظبي بيديك
هذا العمل يجلب عليك المخاطر
وياجب عليك الحرص والله يهديك
وقت المخاطر ما تفيد المشاطر
معيض غياض العنزي
- تبوك
عرّضت نفسك للمخاطر والادراك
متهقوي إنك تمسك الظبي بيديك
لو انفتح بك باب جيبك توطاك
ما ينفعك تعديل وضعك ويمديك
محمد سويكت العنزي - تبوك
تنويه
نستقبل مشاركاتكم الشعرية الى الفاكس رقم 4871070زاوية (صوت الصورة) حتى مساء الاثنين ونأمل التعليق ببيتين فقط لكثرة المشاركات التي تصلنا وأن يكون التعليق صوتاً شعرياً مميزاً ونرحب بالصور التي يرسلها محبو هذه الزاوية.. وياهلا.
ابلاغ
التعليق مقفل لإنتهاء الفتره المحدده له
