الله على جو الرياض الحبيبه
جو يشيل الهم ويزيل الأحزان
جو الثمامة والطعوس تحكي به
ولا على التنهات وأطراف بنبان
تحس وسط الروح حاجه غريبه
ما تنوصف لو جاء مع لسانك لسان
كل العرب فالعاصمة تهتني به
لاهلت مزون المطر هل هتان
والزين لاجتك السحابه قريبه
والبرق فيها ياخذ احيان واحيان
وزخ البرد يشفي الجروح العطيبه
ماكنها الاحب لولو ومرجان
وصوت الصواعق والرعود العجيبه
قدرة اله خالق كل الاكوان
الواحد اللي للدعاء يستجيبه
اللي يسوق الغيم ويهل الامزان
ترى المطر يجلي النفوس الكئيبه
ويزيل هم في محياك قد بان
تلقى العرب كلن يجهز بجيبه
الكل بقدوم المطر صار فرحان
كلن يبي من خير ربي نصيبه
والسيل فاضت فيه دعب وغدران
والعشب الأخضر فاح ريحه وطيبه
حتى الخزامى والنفل عطرها زان
شوف المطر لاجاك من بعد غيبه
يبعد عماس الوقت لو كنت زهقان
علي بن معطش البيشي