الصوره اللي بالخزامى عجيبه
موتر معلّق فوق الانفاق شفناه
شيٍ مقدّر له.. وهذا نصيبه
والعبد ما له غير ما قال مولاه
ترى التهور والجهاله مصيبه
الزم سلوك الرفق.. يا زين ممشاك
علي رشيد الرشيد - رياض الخبراء
الله ستر بسياج جسره تعلّق
من سرعته نفسه يضرّه وغيره
أو بالمطر حاسب ولف وتزلق
والا اعترض له جاهلٍ في مسيره
كانه سلم يرجع لبيته امفلق
أو بالطواري غايبٍ في سريره
فهد بن عقيل الطويان - بريدة
سرعة وتهور والحوادث لها أسباب
الله يكافي شرها كل مخلوق
كم عاجز ومعوق كم منصاب
كم ازهقت روح بلا ذنب وحقوق
هذي رساله موجهه لسايق وشاب
هدّ وتركّد حاسب ومنت ملحوق
سعود بن سعد الحافي - الرياض
افزعوا تكفون يا رجال الطواري
لا يطيح الموتر ويروح فيها
مسرعٍ ما حسب حساب الكباري
توّه أول مرةٍ يمشي عليها
الابو مشغول ما هو عنه داري
يوم جالامه بغا يغمى عليها
غنام مسعود القريني - نعام
تفكروا يا أهل العقول البصيره
بالصوره اللي في خزامى الصحاري
التهوّر له نتايج ضريره
والشاهد الموتر بأحد الكباري
حالة الرحمه عن سبابٍ خطيره
الله يجير الكل من سو الجواري
سعود عائش التميمي الحربي - جدة
هذي الصوره تعبر عن حقيقه
واقعه في كل جزءاً من بلادي
صدقوني الحوادث بالدقيقه
مشكله كبرى على كل العبادي
القياده فن.. ودراسه عميقه
خل مشيك دايم بحذر وركادي
فارس ماطر فارس البقمي - الرياض
يا كثر ما شفنا ويا ما سمعنا
عن الحوادث يا الله تكفي بلاها
يا سايق الموتر تمهل وطعنا
ترى النصيحه يربح اللي خذاها
يا ما ذهبنا مسرعين ورجعنا
نسعى ورا دنيا قصيراً مداها
سعيد بن علي آل برمان الحبابي
وين طالع على الكبري بسيارتك
حادثك حادث السرعه وهذا خطر
ليش هذا التصرف مزعجٍ حارتك
راكب لك سياج وموترك منشطر
والدك لك شرى الموتر وجت غارتك
على من ينتظر نفعك وجني الثمر
جلعود لافي الشمري - حائل
الموتر اللي فوق جسراً معلّق
ما حصل النجده ولا من مساعد
الناس حوله محد فيهم مطلق
ينقذ راع الموتر ويشوف المساعد
حادث شنيعٍ هذي نهاية محلق
ما عاد ينفعه الندم والمواعد
نفل محمد الدوسري
يا ناس أنا ماشي بمان الله الصبح
وخطوطنا تمشي بكل نسيابي
وفجاءه وقع شوفي على منظر قبح
معلق موتر بكبري الروابي
التهوّر والطيش ما ذكر بهن ربح
الا الخساره.. والفنا.. والخرابي
خلف عوض الصوينع - عرعر
سرعه جنونيه.. عواقب وخيمه
وش فايدة سرعه ولو كان عالم
كم واحداً صابه كسوراً أليمه
باسباب سرعه زايده والمآلم
هذي نصيحه والنصيحه فهيمه
نصيحة تهدى ومن قلب سالم
سالم مبارك حبيان الصخابرة
صوره تهز القلب يا بكر هذال
صوره فجيعه والحوادث خطيره
كم حادثٍ تيتمت منه الأطفال
وكم أرمله جتها ظروفٍ مريره
أمر الله ويمشي على كل الأحوال
والله يثبتنا على أحسن مسيره
معتاد بن عويش السلمي - الرياض
منظراً مزعج ولا هوب افتخار
يا ضعيف العقل وش حدك عليه
كل سرعه زايده ترّث دمار
عاقبتها ما تجيب اللي تبيه
موترك روّح وحالك ويش صار
واسلم الله المار لو طاحت عليه
مبارك محمد طرجم الدوسري
على الخط السريع نسوقها يا جماعه سوق
نخالف في نظام المرور ولا حسبناله
ولو ندري وش اللي فالكباري متدلي فوق
ما عاد نقرب للسريع ولا عنينا له
ترى قد قيل فالماضي إذا فاتت لها ملحوق
ولا تسرع ترى السرعه على السواق قتاله
فهد غازي زايد المطيري - الرياض
على الكبري تعلق والسبب يا ربعنا معروف
أقول السعه اللي عادة له ما يخليها
سلوم ما نبيها وانتبه منت ترى مكلوف
ترى لو هو سقط راحت نفوس وانت باليها
فعاليكم زرعتوا للبشر فيها الهلع والخوف
ودروب الرفق مطلوبه هني منهو مشى فيها
محمد بن عبدالعزيز الخنيفر - أشيقر
الله لطيفك ومسك سياج
والا النفق كان مثواكم
خطٍ سريعٍ تحت منعاج
خطراً تريله توطاكم
ارفق عسى لك بها مخراج
ولو جا غشيم تحداكم
سعود بن عبدالعزيز الهزاع - نعام
ترى بعض الحوادث تطفي شعلة المصباح
مناظرها تروع وتحصد أرواحي
الا ياللي تشوف الصوره انتبه يا صاح
ترفق بهونك خلك دوم مرتاحي
واسأل الله يديم الود.. والأفراح
ويجنبنا المخاطر.. وشر الأتراحي
حمد بن عبدالله الوايلي - حوطة سدير
الصوره اللي بالخزامى نشرتها
سيارةٍ طارت على الجسر من فوق
من شد سرعتها كفرتها تحتها
سواقها طفلٍ غشمٍ ومطفوق
ما يعتبر من شوف ناس بلتها
حوادث بأسبابها صار معيوق
عقلا خزن العنزي - تبوك
هاذي هي السرعه وشوفوا يالأحباب
السرعه.. السرعه خطيره ..خطيره
كم واحدن بسبابها راح ثم غاب
فايت وقتن كان وياه ديره
وبسبابها كم واحدن طاح منصاب
وكم واحدن يطول وقت تخديره
بدر بن حمدان بن رازن - الثمالة
@@ نستقبل مشاركاتكم الشعرية حتى مساء الاثنين على الفاكس رقم (4871070) زاوية (صوت الصورة).. ويا مرحباً بالجميع.
التعليق مقفل لإنتهاء الفتره المحدده له
